​Баяраар халиһан бахархал

Бага, ехэ үйлэ хэрэгүүдээр баян байһан 2016 омнай түүхын дансада хэтэ мүнхэдөө дансалагдажа, тэхэрилтэгүйгөөр ошон ошоо. Теэд болоһон олон эдэ үйлэ хэрэгүүдтэ, хэмжээ ябуулгануудта хабаадагшадай, тэдэниие эмхидхэгшэдэй сэдьхэл зүрхэндэ үлэһэн мүр сараануудай үдэр ошохо тума арилгагдажа, шэнэ сагай, шэнэ үдэрнүүдэй үйлэнүүдээр халхалагдажа захалһаашье һаань, үнгэрһэн юумэнэй угалза зурагууд хирэ-хирэ болоод лэ, ухаан бодолдо эли тодоор зурагдахадал гэхэ юм.

Ууган заншалай удха ехэ

Түрэл арадаймнай түшэлгэ болодог, түүхэтэ үйлэнүүдэй баримта бүхэниие абдар соогоо багтаажа шадаһан, Буряад Улас түрын байгуулагдаха сагһаа хойшо эхиеэ татаһан, газар уһан дээрэхи гансахан “Буряад үнэн” сониноймнай түрүүшын дугаарай гараһаар 95 жэлэй, “Бурятия” сониной байгуулагдаһаар 25 жэлэй ойн баярые түгэсхэн дэнзэлһэн хэмжээ ябуулгануудые үнгэрэгшэ жэлэй һүүл һарада ниислэл хотодоо бидэ, Хэблэлэй байшанай хүдэлмэрилэгшэд, эмхидхэжэ үнгэргөөбди.

Ойн баяр гэжэ нэрэтэй ехэ үйлэ хэрэгэймнай үнгэрбэшье, “һамнагдаагүй” бухалнууд шэнги үлэшэхэгүйнь тулада тэрээндээ тэхэрин бусажа, хабаадаһан олон эмхидхэгшэдтээ, ерэһэн айлшадтаа, һайндэрыемнай шэмэглэн гоёоһон олон дуушад, хатаршадтаа, удха түгэлдэр амаршалгын уран үгэнүүдээ сугларагшадай һонорто табиһан эмхидхэн байгуулагшадыемнай түлөөлһэн дарга ноёдтоо, уншагша олондоо бултандань сэбэр сээжын оёорһоо дэлбэрэн гараһан сэдьхэлэй һайхан үгэнүүдээ дамжуулха һанал түрөөд, үнгэрһэн амаралтын үдэрнүүдэй һубаряан соо үлхэлдэбэшье, огто мартагдаагүй. Ушарынь гэхэдэ, арадаймнай угсаата заншалаар, бага ехэ хэмжээ ябуулгануудые, баярай уулзалгануудые зохёон эмхидхэхэдээ, барандаа сугтаа, хамтын хүсөөр бүтээдэг гээшэбди.

Заха хизаартай засагай үүргэ

Түсэблэгдэһэн ехэ хэрэгэй амжалта түгэс дүүрэхэдэ, ажабайдалаймнай ябаса, ажалаймнай амисхал тэгшэржэ, һанаа амар ябахаар тогтууритай саг ерэдэг бэшэ. Тиихын орондо нэгэ бага амяа абажа, зүрхөө доошонь дараад, улам саашаа дабшаха, шэнэ, бүри үндэр, дабаануудые дабаха, ондоо зорилгонуудые бэелүүлхэ хэрэг гарадаг гээшэ бэзэ. Бидэшье, “Буряад үнэнэйхид”, мүнөө иимэл байдалда байнабди. Хэды тиигээшье һаа, үндэһэн түрэл сонинойнгоо шэнэ жэлэй түрүүшын дугаарта хани нүхэдтөө баярай халуун үгэнүүдые дамжуулхамнай.

Буряад хэблэлэй түүхын эхин “Буряад үнэнһөө” эхилһэн гэжэ мэдэрэн сэгнэжэ, манай хэжэ байһан мэргэжэлтэ ажалыемнай мүнгөөр хангажа, улас түрын зүгһөө дэмжэлгэ үгэдэг, суг хүдэлдэг нүхэдыемнай гүрэн түрын шагнал хайрада хүртөөжэл байдаг эмхидхэн байгуулагшадтаа – Буряад Уласай Толгойлогшо – Засагай газарай Түрүүлэгшэ Вячеслав Наговицында, Арадай Хуралай Түрүүлэгшэ Цырен-Даша Доржиевта, уласай парламентын бүхы һунгамалнуудта, мүн тиихэдэ ниислэл хото Улаан-Үдынгөө засаг дарга Александр Голковто баярай үгэнүүдые дамжуулаад, үдэр бүриин хүдэлмэридэнь амжалта, гэр бүлэнүүдтэнь зол жаргал хүсэнэбди.

Засагай газарай түрүүлэгшын орлогшонорто, уласайнгаа яамануудта, һалбари бүхэниие харгалзалан хүтэлжэ байгаа сайд дарганарта, тэдэнэй орлогшонорто, мэргэжэлтэдтэ мүн лэ һайниие дуулгаха дуран хүрэнэ.

Буряад Уласай аймагуудай засаг дарганар болон тэдэнэй орлогшонорые, захиргаануудайнгаа түлөөлэгшэдые эльгээһэн нютагай засагай арба гаран байгууламжануудай ноёдые хүндэлэн ёһолнобди. Хажуу тээһээмнай хараад миин байнгүй, һайхан һанаагаа табижа, сэдьхэлэйнгээ уряагаар һайндэртэмнай ерээд, арад зоноо хүндэлһэнтнай һайшаалтай.

Һаруул ордоной һайхан эзэдтэ

Жэл бүхэндэ заншалта ёһоороо хэмжээ ябуулгануудаа үргэн дэлисэтэйгээр үнгэргэхэдэмнай сэгнэшэгүй ехэ туһа хүргэдэг, үндэр һайхан ордонойнгоо үүдэнүүдые хүндэмүүшэ заншалаараа сэлин угтадаг Буряад театртаа, тэрэнэй дарганарта – уран һайханай хүтэлбэрилэгшэ Эржена Жамбаловада, гүйсэдхэхы захирал Сергей Доржиевта халуун баяр хүргэнэбди.

Сониноймнай ойн баярые үнгэргэлгэдэ хабаадалсажа, горитой ехэ хубитаяа тэсэмгэй абари зантайгаар оруулһан зондо – үндэһэн театрайнгаа зохёохы бүхы хүдэлмэрилэгшэдтэ, тайзан гэһэн эди шэдитэ зэбсэгтэ хэрэгсэлдэ хабаатай хамаг хүнүүдтэ баярай үгэнүүдые дамжуулнабди. Һанаһан бодоһон бүхы һайхан найдалтнай бодото байдалда хүсэлдэжэ, элүүр мэндэ, эгээл дүтэ хүнүүдэйнгээ энэрхы дулаахан дүхэриг соо эрьелдэжэ, хүхижэ ходо ябыт даа!

Тайзанай эзэд түлөөһэ эреэгүй

Буряадай оперо болон баледэй, үндэһэн “Байгал” театрнуудай зүжэгшэд, дуушад, хатаршадта, П.И. Чайковскиин нэрэмжэтэ урлалай колледжын багшанар болон шабинарта шэнэ жэлэй халуун мэндые хүргөөд, зохёохы нарин ажалдань асари ехэ амжалта, харагшад болон шагнагшадай дундаршагүй ехэ дуратай хандаса хүсэн үреэе.

Бэлиг талаангаа Буряадайнгаа түхэреэнһээ холо саагуур ялалзуулан гаргаһан, үндэһэн хэлэеэ, соёл урлалаа, ёһо заншалаа бүримүһэн харуулжа, ондоо арадуудтай, түмэн олон зонтой танилсуулжа ябадаг шэнэ үеын дуушадта, Буряадай циркын зүжэгшэдтэ – уян нугархай басагадта, шандааһа, шүрбэһэ шангатай баатар хүбүүдтэ баярые хүргэнэбди.

Арадайнгаа урданай дуунуудые хангюурдажа, аман зохёолой зүйлнүүдые дэлгэрүүлжэ ябадаг, эсэхэ элэхые, үтэлхэ хүгшэрхые мэдэхэгүй дээдэ үеынхидые – аман зохёолой “Тоонто”, “Гуламта” (Ивалга аймаг) бүлгэмүүдэй гэшүүдые үндэр дээрэ үргэн магтая барандаа!

Түлбэри огто эрингүйгөөр, түни түбшэн зан гаргажа, “Үнэнэй” уншагшадта, Хэблэлэй байшанай хүдэлмэрилэгшэдтэ арсангүй, тайзан дээрээ габшагай болоһон дууша, хатарша артистнартаа баяр баясхалан хүргэнэбди.

Хабаатай хамаг зондо – амар мэндэ, алдар соло!