​Үбэлэй сэнгүү үдэрнүүд

Амаралтын олон үдэрнүүдтэ хүн зон яажа сүлөө сагаа үнгэргэхэб гэжэ һанаата болодогынь һайшаалтай. Диван стол хоёрһоо холо ошонгүй, телевизор хаража байһанһаа газаагуур сэнгэжэ ябабал, һураггүй дээрэ. Хүйтэнһөө айнгүй, ягаа улаахан хасартай болошоһон хүүгэдэйшье, томошуулайшье бэеэ һорижо ябахыень харахада урматай.

Улаан-Үдэ хотын талмайнууд дээрэ шаргаар, конькигаар һолжорхо олон катогууд түхеэрээтэй гээшэ ааб даа. Тэндэ хүн зон олоороо сугларжа, хүгшэн залуу илгаагүй сүлөө сагаа үнгэргэнэ. Тиибэшье арад зон ганса түб талмайнуудта бэшэ, харин холо гэжэ голхоронгүй, хотын заха газараар оршодог амаралтын баазануудташье ошоһон байна. Үхибүүдээ дахуулжа, сана, конькигаар һолжорхо дуратайшуул олоороо сугларба. Тэдэнэр ватрушкада һуужа, үндэрһөөшье hолжоржо, авто-унаада шагтагалдажа, аргаахан гүйлгэлдэнэд. Амаралтын баазануудта квадрацикл, снегоход гэхэ мэтые унажа, илангаяа үхибүүд аргагүй баяртайнууд хүхилдэжэ, энеэлдэжэ сагаа үнгэргэнэ. Шаргада оруулһан хаски нохойнууд сугларһан зоной аргагүй ехэ һонирхол татанад. Тэдэниие хүтэлһэн Марина иигэжэ хөөрэнэ:

- Манай нохойнууд Польшо гүрэнһөө, үшөө тиихэдэ Ростов-на-Дону, Москва, Санкт-Петербург хотонуудһаа асарагдаһан. Нэгэ нохойдо гушан килограмм ашаа тээжэ болоно. Тиимэһээ нэгэ шаргада зургаа, найман нохойнуудые оруулнабди.

Хоёр ондоо нюдэтэй, бэеэр тиимэ томошье бэшэ шэрхи нохойнуудта шэрүүлжэ, удаань гэрэл зурагаа буулгаха аргатай байһан эдиршүүл болон томошуулшье урмашана.

Дарима Анандаевагай гэрэл зураг
Хүүгэд илангаяа квадрацикл болон снегоходоор ябаха дуратай

Дарима Анандаевагай гэрэл зураг

Шаргада оруулһан хаски нохойнууд зоной аргагүй ехэ һонирхол татадаг болонхой

Амаралтын баазын хүдэлмэришэн Елена Анатольевнагай хэлэһэнэй ёһоор, гарагай нэгэнэй, долооной үдэрнүүдтэ орходоо, январь һарын амаралтын үедэ һураггүй олоор хүнүүд ябана. Илангаяа январиин долооной үдэр хүн олон байгаа, табин табан сана абажа халтирба. Ехэнхи зон өөрынгөө хэрэгсэлнүүдтэеэ ерэнэ. Тэдэнэй тоо бүридхэлдэ абтадаггүй байна.

Улаан-Үдэдэ ажаһуугша Ирина Данилина иигэжэ хэлэнэ:

- Бидэнэр амаралтын үдэрнүүд соогуур үхибүүдээ дахуулжа, бэеэ һорижо һурахыень зорижо ерэдэгбди. Сүлөө сагай болоходо, үхибүүдээ һургангаа, дуратайгаар санаар ябадагбди. Сэбэр агаар, ой модон, ямар һайхан гээшэб оршон тойронхи байгаали. Өөрөө жэшээ харуулжа, хүүгэдээ сэнгүүлжэ ябахада, гоё даа.

Дарима Анандаевагай гэрэл зураг

Лиля Оловянная, 14 наһатай:

- Би анхан санаар ябадаг һэмби, теэд гэмэлтээд, болёод байһанаа, дахин багаханаар бэеэ һорижо эхилээб. Яаралгүйхэн дабшаһаар, хуушан түхэлдөө орохоб гэжэ найданаб. Эндэ сугларжа, бэеэ һорижо ябагшадые харахада урматай. Бүхы зондо Шэнэ жэлэй мэндые хүргэнэб.

Олон зон мүльһэн елүүр дээрэ дуратайгаар халтирна. Хүгшэн, залуу илгаагүй конькинуудые үмдэнхэй, урагша хойшоо шуумайлданад. Түрүүшынхиеэ елүүр дээрэ гараһан зон эли харагдана. Унажа, бодожо байгаад, урагшаа дабшанад. Нэгэ зариман унаад, бархираадшье, гэншээдшье абана. Нүгөө зариман шүдөө хам зуугаад, хүл дээрээ бодоод, саашаа халтирна.

Дарима Анандаевагай гэрэл зураг

Карина Мальцева, 7 наһатай:

- Би энэ үбэл гурбадахияа коньки дээрэ гарааб. Оло дахин унанаб, теэд хэдышье үбшэнтэй һаань, тэсээд лэ ябанаб. Халтиржа шадахашьегүй һаа, нэтэрүүгээр оролдоноб. Сэбэр агаараар амилжа, хүхижэ ябахада, намда гоё байна. Унахаяа айнгүй, яба ябаһаар, конькигаар хурдаар ябадаг болохоб гэжэ найданаб.

Амаралтын баазада хүдэлдэг Михаил Иванов өөрынгөө һанамжа иигэжэ хэлэнэ:

- Хүн зон гэр бүлөөрөө, үетэн нүхэдөөрөө ерэжэ, хүхюутэйгээр сагаа үнгэргэнэ. Энээниие хаража байхада, ехэ урматай. Урда жэлнүүдтэ орходоо, һогтуу зон харагданагүй. Энэнь ехэ һайшаалтай, манай хүдэлмэридэшье һаад ушарнагүй ха юм.

Гэртээ бусалганай болоходо, эндэ тэндэ ябаха дурагүйшүүлэй бархирхашье абяан дуулдана. Тиигэбэшье хүхюун энеэдэн, шог зугаа үдэшын боро хараан болотор замхангүй байhаар һэн.