​Улаан-Үдын 2-дугаар һургуули ашаглалда тушаагдахань гү?

Хотын захиргаанай барилгын хорооной түрүүлэгшын орлогшо Эльвира Дабаевагай хэлэһээр, эрдэм мэдэсын үдэр һургуули үүдэеэ сэлижэ, һурагшадаа угтан абаха.

Мүнөө барилгын хүдэлмэри графигһаа урид хэгдэжэ байна. Эндэ барилга-хабсаралгын хүдэлмэри хэгдэжэ дүүргэгдээ. Байшанай хананууд бүхэлэгдөө, залгалаа байшан баригдаа, инженернэ коммуникаци оруулагдаа. Мүнөө һургуулиин хоер байшан дотор дулаансоргонууд дамжуулагдажа, үбэлэй сагта шэрдэлгын хүдэлмэри хэхээр болоо.

Һэльбэн шэнэлэлгын проектын еһоор эрэмдэг бэетэй хүүгэдэй ябаха лифт, шэнэ таһалганууд, оньһон түхеэрэлгэнүүд тодхогдохо болоно. Энэ һургуулида 396 үхибүүд һураха. Харин һурагшадай олон байһан ушарһаа хоер халаанда хэшээлнүүд үнгэргэгдэхэ байна. Залгалаа байшан соо эхин һургуулиин 6 шэнэ класс һураха, спортын болон актова залнууд түхеэрэгдэхэ. Мүнөө һургуули шэнэ түхеэрэлгэнүүдые худалдан абажа эхилээ.

2012 ондо энэ һургуули аварийна гэжэ тоологдоод, хаагдаа һэн гэжэ һануулая.