​Хурамхаанда шонотой тэмсэлгэ эршэдэһээр

Шононууд ажахынуудта һаад ушаруулһаар. Нёдондо 19 толгой адуун, 3 үхэр болон 15 хонин тэдэнэй аманда орожо хосорһон байна.

Хурамхаан аймагта абтаhан тусхай программын ёһоор, хюдагдаһан нэгэ толгой шонын түлөө ангуушанда 5 мянган түхэриг түлэгдэнэ. Энэ жэлдэ тус программа бэелүүлгэдэ 200 мянган түхэриг һомологдоо. Жэлэй эхинһээ 8 шоно хюдагдаа. Илангаяа Барагхан һууринайхид хамтын оролдолгоор зэрлиг арьяатадтай тэмсэлээ шангадхаба. Өөрынгөө мүнгөөр 19 мянга гаран түхэригэй 24 хабхаануудые, 160 литр бензин абаа. Энэ дүй дүршэлыень бусадшье нютагууд хэрэглэхэ түсэбтэй.