«Буряад шудалал» гэжэ сэтгүүлэй ээлжээтэ 6 дугаар боти ном болгогдожо хэблэгдэбэ. Монгол уласай Буряад шудалалай академи энэ сэтгүүлые эмхилжэ гаргадаг юм.
“Хэлэн, удха зохёол”, “Түүхэ, угсаатан, соёл”, “Тэмдэглэл, бодомжо, мэдээсэл”, “Һонирхуулха булан” гэһэн дүрбэн хубиһаа энэ сэтгүүл бүридэнэ.
Тус боти номдо хамта дээрээ 33 хүнэй бэшэһэн үгүүлэл (статья) багтааба.
Буряад шудалалай академиин юрэнхылэгшэ, “Буряад шудалал” сэтгүүлэй энэ дугаарые эмхидхэһэн М. Одмандах багшын үгүүлэлһээ ном эхилнэ. Монголой алдарта зохёолшо, арадай уран зохёолшо Сэнгийн Эрдэниин уран бүтээлдэ буряадуудай ажамидарал, зан заншал, ажахын байдал харуулһые “Хойто наһандаа уулзахабди” романай зарим жэшээгээр тобшохон абажа үзэһэн байна. Буряадуудай нүүлгэ, сүлэлгэ, тэрэ үеын ажамидаралые үнэн бодотоор роман соо харуулагдаа гэжэ М. Одмандах шэнжэлэлгэ соогоо бэшэнэ.
Буряад уласай Ивалга аймагай Доодо-Ивалгын дунда һургуулиин багша Л.Б. Банзаракцаева “Оньһон үгэнүүдые буряад хэлэнэй хэшээлдэ хэрэглэхэ тухай” үгүүлэл бэшэбэ. Ивалга аймагай Һужаагай дунда һургуулиин багша В.А. Найдановагай “Э-Х. Галшиевай “Бэлигэй толи” зохёолой сэнтэй һургаалнууд” гэһэн гаршагтай ажал үгтэнэ. “Буряад хэлэнэй орёо мэдүүлэлнүүдэй байгуулга” гэһэн үгүүлэлые Буряадай гүрэнэй ехэ һургуулиин багша, эрдэмтэн О.Г. Макарова бэшэбэ.
“1930-аад онуудай монгол бэшэг дээрэ бэшэгдэжэ байһан буряад хэлэнэй ниитэ-улас түрын (политическэ) лексикэ шэнжэлэлгэ” гэһэн гаршагтай залуу эрдэмтэн Ж. Санжановай ажал ехэ һонирхол түрүүлнэ. XX дугаар зуун жэлэй 20-30-аад онуудай монгол бэшэг дээрэхи ном сударта буряад хэлэнэй ниитэ-улас түрын лексикэ баян юм. Мүнөө дээ- рээ тэрэ хуушанай ном сударнууд, оршуулганууд хэлэ шэнжэлэлгын (лингвистикын) талаһаа бага үзэгдэһэн байна. Монгол бэшэг дээрэ бэшэгдэжэ байһан лексикын ехэнхи хубинь мүнөөнэй буряад хэлэндэ үсөөн хэрэглэгдэнэ. Юундэб гэхэдэ, монгол бэшэгэй хоригдоһон ба буряад хэлэнэй лата үзэгтэ шэлжүүлэгдэһэн ушарһаа иимэ байдал тогтоһон гэжэ эрдэмтэ ажаглалта хэнэ.
“Шэлын голдохи “Хуушадай буряад-монголшууд” гэһэн эрдэмэй ажалые Шэнэхээнэй буряад шудалааша Цогтын Жамса бэшэжэ гаргаба. Ц. Ринчиндоржо түрүүтэй нэгэ бүлэг бу- ряадууд 1931 онһоо 1947 он хүртэр амяараа хошуун боложо ябаһан ба тэдэ- ниие “Хуушадай буряад”, “Модонгоогой буряад” гэжэ нэрлэжэ заншаһан юм. Энэ бүлэг зоной Ехэ Хинганай дабаа (Хинганский хребет) дабажа нүүһэн, тэндэ зоболон үзэһэн түүхэ тодорхойгоор бэшэгдэбэ.
“XVIII зуун жэлэй үеын Үбэр Байгалай буряадай ниигэмэй байгуулал (социальный строй)” гэһэн үгүүлэлые Монголой шэнжэлхэ ухаанай академиин Түүхэ, археологиин хүреэлэнэй эрдэмтэн, доктор Cонгоол Б. Нацагдоржо ниитлүүлбэ. Б. Нацагдорж болбол ехэ үрэ дүнтэй хүдэлдэг залуу хүн юм. Түүхын “хүндэхэн” сэдэб хүндэжэ, архив сооһоо ехэ хоморой мэдээ баримта “малтажа” абаад лэ толилуулжа байдаг. Тэрэнэй үгүүлэлэй 3-дахи хүснэгтэ Үбэр Байгалай буряадуудай отогуудай бүрилдэл абаһаар лэ уншагшадые һонирхуулха байха. Буряа- дай уг гарбалай отогууд тоологдоно. Жэшээнь: Галзууд отогууд - доргошо, сарбада, жинхэн, даганхан, хабагай, эршим, онход, дэлдгэр, хайтал, нохой ураг, шоно, олзон, хатагин; Хуасай отогууд - баршиуха, бэгтэр, боохой, онгор, тогтор, сагаан малгай, баабагар, харилхан, табахал; Шарайд отогууд - худанса, ахайд, долоод, тоботой, дэлдэй, хагшуул, сүнид.
Сонгоол отогууд - авгачуул, баатуд, шарнууд, урианхад, өрлүүд, еншүүбү, цоохор, хотогойд, номход, илжигид, аравтан, сартуул, хорчид, болингууд; Табнангууд (табангууд) отогууд - хурлаад, урианхай, хачинууд, баатуд, тайжнар, цонгоол, хэрэйд, онход, авгад, өрлүүд, аравтан, хатагин, ашабагад, булгад, буумал, галзууд, олзон, хальбан, харнууд; Шоно отогууд - хайтал, адаг, борсой, хамнай, таанууд, шибтүхэй гээд лэ омогуудай отогууд олоороо үгтэхэ юм.
Дид доктор Д. Цэдэнжаб багша “Буряад арадай һурган хүмүүжүүлхэ уламжалалһаа” гэһэн гаршагтай үгүүлэл соо үбгэд хүгшэдэй һургаалай үгэнүүд болон буряадуудта мүнөө сагта байһан һайн һайхан хүнэй абари зан, шанар шэнжэ тухай хэлэгдэнэ.
Буряад хониной биологиин зарим онсолиг тухай, Хори буряадай гушад омог тухай, Буряадай бөө тухай, Харгана омогой Нимын Холхортоной тобшо түүхэ, Буряад-монголые хүлгөөһэн түүхэ тухай ехэ һонирхолтой үгүүлэлнүүд сэтгүүлдэ оробо.
Буряадта мэдээжэ ниитлэгшэ Н. Бальжинимаевагай “Буряад-монголшуудай сэдьхэл һанаан» гэһэн сэдэбээр Хамба лама Д. Аюшеевтэй хэһэн хөөрэлдөөн, “Буряад үнэн” сониной редактор Бадмажаб Гындынцыреновэй «Шэнэ үгэнүү- дые хэн бүтээдэг бэ?” гэһэн үгүүлэлнүүд энэ сэтгүүлэй дугаарта мүн лэ толилогдобо.
“Буряад шудалал” сэтгүүлэй шэнэ дугаар абажа уншаха дуратай байгаа һаа, иимэ утаһаар холбоо барихада болоно: 8-914-058-39-11.
Бадма ЖАБОН