Шог зугаада дуратайшуул

Дэлхэй дээрэ бэлиг талаантай, һүбэлгэн ухаатай, шог ёгто дуратай хүбүүд, басагад олон юм ааб даа. Хэжэнгын лицей-һургуулиин эдэбхитэд сугларжа, «Ми-Лицей» команда байгуулаад, КВН нааданда эдэбхитэйгээр хабаадажа эхилһэн юм. Энэшье удаа тус командын гэшүүд шалгарһан байна. Аймагайнгаа хэмжээндэ болодог КВН нааданда оло дахин илажа, түрүүшүүлэй һуури бата бэхеэр эзэлээ. Хүдөө аймагай командануудай дунда Улаан-Үдэдэ үнгэрһэн КВН нааданда Хэжэнгэ аймагай суглуулагдамал команда гурбадахи һуури эзэлһэн байна. Эдэ залуушуул һургуулиин һүүлээр ондо ондоо командануудай бүридэлдэ орожо, эдэбхитэй ябуулгаяа орхёогүй. Удаань тэдэнэр сугларжа, «Өөрын улад» («Свои люди») гэжэ команда байгуулаад, олоной дунда мэдээжэ болонхой. Эдэнэр Зүүн Сибириин гүрэнэй технологическа университет түлөөлдэг байна. «Өөрын улад» командын захирагша Амина Санжиеваһаа тэдэнэй ажабайдал тухай һонирхобоб.

- Өөһэдынгөө ажал тухай хөөрэжэ үгыт.

- Манай команда залуу. Бидэнэр үндэр амжалта туйлаашьегүй һаа, түсэбүүднай ехэ. Саашадаа урган далижажа, Ород гүрэн дотороо мэдээжэ болоһон КВН наадагшадтай хамта нэгэ тайзан дээрэ гарадаг болохо түсэбтэйбди. Сүлөө сагтаа һонирхолтой видеоролигуудые буулгажа, «Инстаграмм» гэһэн ниигэмэй сүлжээндэ (социальна сетьдэ) олон харагшадта дамжуулдагбди. Бидэнэр Буряад Уластаа болодог хэмжээ ябуулгануудта эдэбхитэйгээр хабаадажал байдагбди. Нэгэ хэдыень нэрлэбэл, Улаан-Үдэ хотын мэрэй кубок, «СГУТУ-гай Мисс ба Мистер», КВН буряадаар гэхэ мэтэ.

- Хүн зондо һонирхолтой, энеэдэтэй юумэ харуулха, хөөрэхэ шог зугаа хаанаһаа абанат?

- Энээн дээрэ бидэнэр өөһэдөө хүдэлдэгбди. Тайзан дээрэһээ шог ёгто, энеэдэтэй үйлэ хэрэг, ушар ябадал тухай хэлэхэ гэбэл, олон ааб даа. Харин тэрэнээ болбосоруулжа, юумэн болгожо харуулха гээшэ тиимэ бэлэн бэшэ. Нэгэнь дурадхал оруулха, нүгөөдэнь тэрэнииень үргэлжэлүүлхэ, тиигэ тиигэһээр зохид номер бии болодог.

- Буряад Уласта жэл бүри «КВН буряадаар» гэһэн мүрысөөн үнгэргэгдэдэг. Таанад энээндэ хабаадаһан гүт?

- Манай команда хоёр дахин энээндэ хабаадаһан байна. Энэ мүрысөөнэй гол зорилго хадаа түрэл хэлэеэ хүгжөөлгэ болоно гээшэ ааб даа. Буряад хэлэн дээрэ үнгэрдэг КВН нааданда манай арад зоной абари зан, ухаан бодолой ябаса, ажабайдалда ушардаг үйлэ хэрэгүүд тухай шоглон харуулдагбди. Түрэл хэлэнэй мартагдажа байһан тухайшье шог зугаа хөөрэһэмди. Тиигээд ганса энеэдэн болоод дүүрэшэхэ бэшэ, харин хүн зоной манай шогложошье һаа, харуулһан, хэлэһэн тухай бодолгото боложо, анхаржа, ухаан бодолоо хүдэлгэхэ гэжэ найдадагбди. Манай буряад хэлэн мартагдаагүй, сагай эрхэ байдалда тааруу ябана гэжэ харуулхаяа оролдонобди. Жэшээлбэл, манай шог: Залуу хүбүүн гар утаһа баряад, хэлэнэ: «Зай, гугл, яагаад хошхоног шанахаб?». Тэндэһээнь харюу: «Хошхоног шанахын тула хүгшэн эжыдээ түрүүн хонходо»; Эдеэ хоол баридаг газарта хулгайшад ороно: «Булта байһан байрадаа зогсогты, энэ буряад ограблени, зуун бууза стол дээрэ табигты!». Харюудань эдеэ шанадаг эхэнэр нэгэшье айһан хэбэргүйгөөр асууба: «Хори минута соо хүлеэхэ гүт?».

- Орёо асуудалнуудые шиидхэхэ саг ерэдэг гү?

- Ажабайдалда зүрилдөөтэ асуудалнууд гаражал байдаг. Жэшээлбэл, бидэ, оюутад, һуралсалайнгаа хажуугаар КВН наададагбди. Тиимэһээ заримдаа сүлөө саг олдодоггүй. Хүн бүхэн баһал өөрынгөө хэрэгүүдтэй байдаг. Тиимэһээ манай зариман болишоно, ондоо хүнүүдые бэдэрдэгбди. Бидэ согтой, солбон, хүнгэн, урагшаа һанаатай, тайзан дээрэһээ бэеэ харуулжа шадаха хүнүүдые мүнөөшье дуратайгаар угтан абахабди.

- Хэн таанадта мүнгэнэй талаар туһаламжа үзүүлдэг бэ?

- Бидэнэр өөһэдөө арга мүрөө бэдэрдэгбди. Заримдаа һайндэрнүүдэй найрта уридаг, нэгэ хэды шог ёгто видео-амаршалгануудые буулгадагбди. Иимэ ажал тон хомор байдаг. Тиимэһээ наадан бүхэндөө өөһэдынгөөл шадал хүсөөр болодогбди. Манай олон нүхэд, түрэл гарал, танил зон ехэ туһа хүргэдэг. Үнэн дээрээ мүнгэ бэдэрэлгэдэ ехэхэн лэ саг ябашадаг. Энэнь лэ харамтай. Нааданда хэрэгтэй һонин һонин юумэ зохёохо, бэшэхэ саг бага болоно. Тиигэбэшье урмаа хухарангүй, ажалаа бүри эршэтэйгээр ябуулнабди.

- КВН наадан тухай, командын гэшүүд, юу хэлэхэ байнабта?

Намжал Коновалов, «Свои люди» командын капитан:

- Бага классуудта һурахадаа, КВН-дэ хабаадахаяа һанадаг байгааб. Ахалагша классай үхибүүдэй наада хаража, ехэ гоёшоодог һэмби. Теэд удаань өөрөө «Ми-Лицей» гэһэн командын капитан болоһон байнаб. Аймагайнгаа хэмжээндэ үнгэрдэг КВН нааданда оло дахин илаһан байнабди. Һургуулиин һүүлээр Томск хотодо һуража байха үедөө «Ваши» гэһэн командын түлөө наададаг байгааб. Удаань Улаан-Үдэ хотоёо бусаха баатай болооб. Һургуулида суг һураһан нүхэдөөрөө хамта команда байгуулжа, КВН наадаяа үргэлжэлүүлһээрбди. Манай команда залуу. Тиигэбэшье бултадаа оролдожо, үндэр амжалтануудые туйлахабди. Үнэн сэхээр оролдобол, хэрэгшье бүтэсэтэй байдаг гэжэ һанадагби.

Жалсан Батожапов - командын гэшүүн:

- Буряад Уласта КВН-эй хүгжэжэ байһанда ехэ баясанаб. Минии ажабайдал КВН-тэй нягта холбоотой. Саашадаа энэ урасхалай улам хүгжэжэ байхыень хүсэнэб. Энэ командаараа саашадаа Сочи хотодо үнгэрдэг «КиВиНдэ» хабаадахабди гэжэ найданам.

Антон Янаев – командын гэшүүн:

- Тус командын бүридэлдэ би орохоёошье мэдэнгүй байһанби. Абяа буулгаха хүн хэрэгтэй гэжэ намайе нүхэр хүбүүмни Намжил дуудаһан байгаа. Тиигээд би мүнөө эндэб. Сагнай ехэ хүхюутэйгээр үнгэрдэг, тиигэбэшье ехэ харюусалгатайгаар ажалдаа хандадагбди. Эбтэй эетэйгээр бэлэдхэлэй ажалаа ябуулдагбди. Үнэн дээрээ КВН гээшэ ехэ һонирхолтой үйлэ хэрэг.

Базар Цыренов - командын гэшүүн:

- Би хоёрдохи курсда һуража байнаб, һуралсални даб дээрээ шухала. КВН намда ехэтэ һайшаагдадаг. Манай багахан бүлэг минии гэр бүлэ болонхой.

Булад Базарсадуев - командын гэшүүн:

- Би багаһаа хойшо олон хэмжээ ябуулгада эдэбхитэйгээр хабаададагби. КВН нааданда би ехэ дуратайб. Мүнөө үедэ сэрэгэй алба гаража байнаб, бусаад, энэ ажаябуулгаяа орхихогүйб.

Амина Санжиева - командын гэшүүн:

- Эдэ хүбүүдтэй тус командын бүридэлдэ ябахадаа, өөртөө олон шэнэ юумэ олооб. Ажабайдалай асуудалнуудта ондоо хандасатай болооб. Шэнэ юумэн һонирхол түрүүлдэг гээшэ ааб даа.

Дондок Дашипылов - командын гэшүүн:

- Намда КВН наадан үзэгдөөгүй, мэдэгдээгүй юумэн байһан юм. Намайе һайханаар дууладаг гэжэ мэдээд, Амина дуудаһан байгаа. Энээнһээ урид «Эдир Будамшуу» гэһэн мүрысөөндэ хабаадаһан байнаб. КВН-дэ наадахын тула ехэ һүбэлгэн, уридша, артистична байха шухала. Тиимэһээ би дүршэлтэй боложо ябанаб. Иимэ бэлиг талаантай хүнүүдээр уулзаһандаа ехэ баяртайб.

Еши-Зунды Содбоев - командын гэшүүн:

- Харахада, КВН ехэ бэлэн шэнгеэр һанагдадаг. Теэд тиимэшье бэлэн бэшэ. Хурса, мэргэн, тааруу шог зугаа зохёохын тула ехэхэн саг, шадал гарадаг. Харагшадай энеэхыень харахадаа, дуулахадаа, ажалайнгаа дүн ойлгонош. Минии һанахада, КВН наадан залуушуулые эблэрүүлһэн, нэгэдүүлһэн хэмжээ ябуулга болоно.

Надмит Бадмацыренов - командын гэшүүн:

- Тус командын бүридэлдэ би шэнэ хүмби. КВН гээшэ ехэ һонирхолтой ажаябуулга. Минии ажал ехэ харюусалгатай. Хүгжэм дуу, абяа хэрэгтэй сагтань, һаадгүйгөөр табижа, нааданай шанар алдуулхагүй гэжэ оролдоноб . Хэды хүндэшэг байгаашье һаань, намда КВН ехэ һайшаагдаана.

Эдэ залуушуул бүхы зүрхэ сэдьхэлээ, һанал бодолоо, сүлөө сагаа КВН нааданда зорюулжа, үндэр амжалта туйлаха гэжэ найдагдана.