​Хоёр һургуулиин харилсаа холбоон

Хоёр жэлэй саана Монгол Уласай Улаан-Баатар хотын 1-дэхи һургуули Улаан-Үдын 29-дэхи буряад гим­назитай харилсаа хол­боотойгоор ажалаа ябуулха тухай хэлсээ баталһан байгаа.

Улаан-Баатарай 1-дэхи һургуулиин 4 багша Буряадта ал­банай хэрэгээр ерэбэ: һургуулиин захиралай орлогшо Н. Манлай, фи­зикын багша Р. Энхбат, орос, англи хэлэнүүдэй багша Н. Тувшинжар­гал, зурагай багша Г. Энхболд. 29-дэхи гимназиин захирал Баир Ширапов эдэ багшана­рые «Буряад үнэн» Хэ­блэлэй байшанай захи­рал Баяр Балдановтай уулзуулба. Удаань тэдэ Буряад Уласай болбо­соролой болон эрдэм ухаанай сайдай уялга дүүргэгшэ Баир Жал­сановтай хөөрэлдэһэн байна.

Саашадаа хоёр оро­ной hургуулинуудай хоорондохи харилсаан бүри нягта болохоор түсэблэгдэбэ. Хэрбээ энээнhээ урда тээ баг­шанар лэ ябалсажа, дүй дүршэлөөрөө хубаалда­даг һаа, мүнөө үхибүүд һургуулинуудаа һэлгэжэ һурадаг болохо юм. Мүн баhа Буряадай һурагшад ерэхэ апрель һарада Монголдо үнгэрхэ математикаар, физи­кээр болон информати­каар олимпиадануудта хабаадаха болобо.

Монголдо уласай 1ОО гаран һургуулинууд тоологдоно, тэдыл хубиин һургуулинууд бии. Монгол Уласай Ула­ан-Баатар хотын 1-дэхи һургуули түрүү һургуулинуудай тоодо ороно. Суута эрдэмтэн Бямбын Ринчен гуайһаа эхилээд, мүнөөдэрэй олон тоото үндэр тушаалтад тус һургуули дүүргэһэн юм. Мүнөө һургуулида 14О багшанар 3 мянган шабинарта эрдэм ном заадаг юм.

Аркадий Батомункуевай гэрэл зураг
"Буряад үнэн" сониной редактор Бадмажаб Гындынцыренов, "Буряад үнэн" Хэблэлэй байшанай захирал Баяр Балданов, Улаан-Үдын 29-дэхи буряад гимназиин захирал Баяр Ширапов монгол айлшадтай