787
Буряадай хүдөө ажахын дээдэ һургуулиин дэргэдэ һурагшадай дунда биологёор олимпиада эхилбэ. Һурагшадай эрдэм мэдэсэ шалгаха жюриин гэшүүд ехэнхидээ тус һургуулиин багшанарһаа бүридэнэ.
Бүхэроссиин олимпиадын уласай шатада һурагшад хоёр бүлэг боложо хубаарха юм. Нэгэдэхи бүлэгтэ 9-дэхи ангиин һурагшад, хоёрдохи бүлэгтэ 10-11-дэхи классуудай һурагшад мүрысэхэ болоно. Олимпиадада гансашье номоор олдоһон мэдэсэнүүдтэ хабаатай бэшэ, мүн лэ хэрэг дээрэ тэрэ мэдэсэеэ бэелүүлхэ талаар даабаринууд байха юм. Түрүүшын шатада биологеор асуудалнуудта харюу үгэхэ, хоёрдохо шатада лабораториин түхеэрэлгэнүүдые хэрэглэн, шэнжэлэлгын ажал ябуулха болоно.
-Түрүүшын шатада һурагшад биологиин бүхы һалбаринуудһаа абтаһан тестын асуудалнуудта харюу үгэхэ болоно. Практическа даабаринуудые дүүргэхэдээ, хүнэй бэеын досоохиие һажааһан хэмэл түхэлнүүд, амитадай арһаар хэгдэһэн дүрсэнүүд, нюргагүй амитад гэхэ мэтые мүрысэгшэд шэнжэлхэ юм. Биологёор үнгэрхэ олимпиадын асуудалнуудые Түбэй тусхай комисси бэлдэһэн байна. Тэдэнь биологёор болодог Уласхоорондын олимпиадын эрилтэнүүдтэ тааруу, - гэжэ Буряадай гүрэнэй хүдөө ажахын дээдэ һургуулиин байгаали хамгаалгын болон газарзохид болголгын тэнхимые даагша, жюриин түрүүлэгшэ, хүдөө ажахын эрдэмэй дид-доктор Эржена Имескенова хэлэнэ.
Биологёор олимпиадын дүнгүүд февралиин 11-дэ мэдэгдэхэ юм
Дарима АНАНДАЕВА,
“Буряал үнэн” мэдээсэлэй албан
