832
Хори аймагһаа гадуур ондоо аймагууд болон Улаан-Үдэ хото хүрэтэр элдэб мүрысөөнүүдтэ һургуулиин үхибүүдэй олоороо ябадагынь мэдээжэ. Тиигэбэшье, һургуулиин захиргаанууд харгын аюулгүйе сахидаг эмхинүүдтэ оройдоо хандадаггүй гэжэ Хори аймагай прокуратура мэдээсэнэ.
Хүүгэдые шэрэхэ жолоошод тусхай инструктаж гаража, машинануудай техническэ байдал заабол шалгагдаха ёһотой юм. Энээнһээ гадна, һурагшадай нэрэ обог, тоо, тэдэниие хаража ябаха багшанар, үхибүүн бүхэнэй һууха һуури, харгыда ябахадаа эдихэ хоол, унда абажа ябаха гэһэн хэрэгтэй дансануудые һургуулиин захиргаанууд бэлдэдэггүй байна. Харгыда гараһан һурагшад заабол эдеэ хоолоор хангагдаха ёһотой юм. Машинануудай аюулгүйе сахиха паспортнууд гуримгүйгөөр бэшэгдэдэг гэжэ прокуратурын ажалшад тэмдэглэбэ.
