754
Һуралсалай жэлэй түгэсэхэдэ, һурагшадай тушаадаг ЕГЭ, ОГЭ,ГВЭ шалгалтануудай үдэрнүүдые Ородой Холбоото Уласай Болбосоролой болон эрдэм ухаанай яаман элирүүлжэ, тэрээндэнь Юстициин яаман тогтоол абаба гэжэ Һуралсал хинадаг эмхиин хэблэлэй албан мэдээсэнэ.
2017 ондо ЕГЭ тушааха болзор иигэжэ хубаарба. Байгша оной мартын 23-һаа апрелиин 14 болотор һурагшад сагһаа урид шалгалтаяа тушааха аргатай. Майн 29-һөө июлиин нэгэн болотор бүхы шабинар шалгалта бариха. Гурбадахи шатань сентябрь һарада үнгэрхэ. Тус шалгалтанууд географи болон информатикаар эхилхэ. Ород хэлэн болон тоо бодолгоор хоёр гэһэн сэгнэлтэ абаһан һурагшад сентябриин табанһаа арбан зургаан хүрэтэр шалгалтаяа дахин тушааха аргатай.
Юһэдэхи классай һурагшад баһал гурбан ондоо болзорто ОГЭ тушааха болоно. Сагһаа урид – апрелиин хоринһоо майн зургаан болотор, бүхы һурагшадай тушааха болзор майн 26-һаа июниин 29 болотор, саг соогоо тушаажа шадаагүй һурагшад сентябриин 5-һаа - 22 болотор шалгалта бариха болоно.
Алибаа шалтагһаа шалгалта тушаажа шадаагүй һурагшадта, үшөө нэгэ шалгалтын үдэр нэмэгдэнхэй юм.
