​Хүүгэд харгын дүрим сахижа һурана

Хүүгэдэй элүүржүүлгын түбтэ нээгдэһэн шэнэ талмай үхибүүдэй һонирхол ехээр татана. Һүүлэй үеын оньһон хэрэгсэлнүүдээр хангагданхай һуралсалай класс, автотренажёр, харгын аюулгүйе сахидаг албан, автобусай буудал, светофор болон бүхы харгын тэмдэгүүдтэй асфальт тус талмайда хараалагданхай. Эдэ бүгэдые Буряад уласай эгээл эдир ажаһуугшад харадаг, туршадаг юм.

Энэ түсэл бэелүүлгэдэ хүндэ байдалда ороһон үхибүүдые дэмжэдэг Фонд болон “KIAMotorsRus” компани хабаадаһан байна.

Харгыда аюулгүйе сахижа ябаха хэшээлнүүдтэ аймагуудһаа ерэһэн үхибүүд олоор хабаадаха аргатай. Тэдэнэр наадажа, фильм хаража, харгын аюулгүйе сахиха тухай дүримүүдтэй танилсана. Дулаанай сагта, үхибүүд веломобиль болон велосипедтэ һуужа, харгын дүримүүдые эбдэнгүй, гүйлгэлдэдэг юм.

Эндэ үнгэргэгдэдэг хэмжээ ябуулагада Гүрэнэй автоинспекциин ажалшад хабаадалсадаг. Тэдэнэр үхибүүдтэ харгын дүримүүдые сахижа ябаха тухай дахин һануулан, хэшээлнүүдые үнгэргэдэг. Энэ хэмжээ ябуулгада гансашье “Светлый” түбэй үхибүүд бэшэ, харин хотын һургуулинуудай шабинар хабаадалсадаг гэжэ Ниигэм хамгаалгын яаман мэдээсэнэ.

Саашадаа электромобиль болон картингуудые абажа, энэ талаар ажалаа үргэлжэлүүлхээр элүүржүүлгын түбэй ажалшад хараална