681
Буряад Уласай Ниигэм хамгаалгын талаар сайд Татьяна Быкова, хотын барилгын хүтэлбэриин болон барилгын компаниин түлөөлэгшэдтэй хамта Улаан-Үдын 111-дэхи микрорайондо оршодог байшан гэрэй барилга шалгаба. 135 байратай бодхоогдожо байһан гэртэ үншэн үхибүүд зөөжэ орохо юм.
Гэрэй барилгые хизаарлагдамал харюусалгатай “Удинское” гэһэн бүлгэм бэелүүлнэ. Барилгын ажал саг болзортоо хэгдэнэ. 2017 оной июнь һарада үншэн үхибүүдтэ үгтэхэ гэр бэлэн болохоор түсэблэгдэнхэй.
Гэрэй торхонь бодхоогдожо, дулаасуулгын, халуун, хүйтэн уһанай соргонууд тодхогдожо, сонхо табиха болон бэшэ дотор талын ажал хүдэлмэри хэгдэжэл байна. Баригдажа байһан гэр болбосон түхэлтэй болгогдожо, тушаагдаха юм.
Улаан-Үдэдэ болон бүхы Буряад Уласта үншэн үхибүүдэй байрлаха гэрнүүдэй барилга дэмжэжэ, хүдэлмэрииень улам эршэдүүлхэ тухай энэ комииссиин гэшүүд тэмдэглэбэ.
