​Эдир хүбүүнэй баатаршалга

Хоёр багашуулые түймэрэй үедэ абарһанайнгаа түлөө Улаан-Үдын һургуулиин шаби Юра Жарников шагналда хүртэбэ.

Буряад Уласай Засагай газар 17-дохи һургуулиин һурагша Юра Жарниковта баяраа мэдүүлжэ, Уласхоорондын “Артек” гэһэн лагерьта амарха путёвко Алексей Цыденов барюулба.

2017 оной январиин эхиндэ түймэрэй дүлэн сооһоо хоёр багашуулые Юра Жарников абарһан байна. Мартын 13-да эрэлхэг зоригойнгоо түлөө эдир баатар шагналда хүртэбэ.

“Буряад Уласай Засагай газарай зүгһөө, өөрынгөө зүгһөө баатар хүбүүе хүмүүжүүлһэн Наталья Николаевна Жарниковада, түрэлхидтэнь болон 17-дохи һургуулиин багшанарта баяр хүргэнэб,”- гэжэ Буряад Уласай Толгойлогшын уялга саг зуура дүүргэгшэ хэлэбэ.

Һуралсалдань амжалта хүсөөд, Юра хүбүүндэ Алексей Цыденов иигэжэ хэлэбэ:

-Үхибүүдые аюулһаа абаржа байхадаа, баатаршалга хэжэ байнаб гэжэ огто һанаагүйш. Тиимэһээ шинии ябадал бүри сэнтэй.”