​Буряадай залуушуул IT-шэглэлээр мэргэжэхэнь

Улаан-Үдэ хотодо IT-шэглэлээр hонирходог залуу­шуулай хоёр түб байгуулаг­даба. СибГУТИ-гай болон Буряадай гүрэнэй университедэй дэргэдэхи иимэ түбүүд бэлигтэй залуушуулые урина.

Болбосоролой таһагууд тон түргэн хүдэлдэг компьютернуудаар хангагдаба. Тэрээнһээ гадна мүнөө сагай рободуудшье мэдээсэлэй тех­нологинуудаар һонирходог залуу­шуулай анхарал татана. Энэ дэлхэй дүрбэн зүг, найман хизаартай гэжэ бултанда мэдээжэ. Тэрээнһээ гадна дээшээ, доошоо гээд тоолохо болоо һаа, дэлхэйн арбан зүгтэ амидарна гээшэбди. IT-шэглэлээр хүдэлхэ за­луушуулай хэрэглэдэг мэдээсэлэй технологинууд иимэ мэдэсэ эршэ­тэйгээр ашаглана.

- Мүнөө дээрээ хуйха хэрэглэн, оюутад зохёоһон зүйлнүүдээ барла­жа гаргана, - гэжэ Буряадай гүрэнэй университедэй IT-таһагай дарга Ва­дим Матонин хөөрэнэ.

Yхибүүдые бага наһанһаань гайхал түрүүлмэ оньһон түхеэрэлгэнүүдтэй БГУ танилсуулжа захалба. Буряад орондоо шадамар бэрхэ түрүү мэргэжэлтэдые hургаха гэһэн зорилго багшанар табиhан байна.

Энэ хэрэг гүрэнэй талаһаа нилэ­эд һайн дэмжэлгэтэй. «Үндэһэтэдэй техническэ үүсхэл» ниитэ гаршагтай хүтэлбэриин ашаар, уласай Болбо­соролой болон эрдэм ухаанай яама­най тэдхэмжээр иимэ һургуулинууд Улаан-Үдэдэ байгуулагдаба ха юм.

- Оюун ухаагаа гүнзэгыгөөр хүгжөөжэ, оньһото мэдээсэлэй тех­нологиин шэглэлээр хүдэлдэг мэргэ­жэлтэдые бэлдэхэ эрилтэ манай урда табигдана, - гэжэ ажа үйлэдбэриин болон худалдаанай сайд Алексей Мишенин лаблаба. Мүнөө дээрээ Улаан-Үдэ хотодо иимэ гурбан түб нээгдэнхэй. Жэлэй дүүрэтэр иимэ үшөө нэгэ түб байгуулагдаха. Бэлиг­тэй оюутад болон һурагшад эндэ түлбэригүйгөөр һураха аргатай юм.