​“Эрхим һурагша- 2017”

Мартын 17- до «Буряад Уласай эрхим һурагша – 2017” элирхэ.

Буряад уласай бүхы аймагуудһаа эдэбхитэй, бэлиг талаантай 28 һурагшад “Эрхим һурагша” гэһэн нэрэ зэргын түлөө хаба шадалаа туршалсахань. Тэдэнэр өөһэдынгөө бэлдэһэн зохёохы түсэлнүүдые хамгаалха, импровизаци-мүрысөөндэ хабаадажа, мастер- класс харуулха болоно. 2017 он байгаали хамгаалгын жэл гэжэ тунхаглагдаһан тула мүрысөөн оршон тойрониие хамгаалгада зорюулагдана. Буряад Уласай Болбосоролой болон эрдэм ухаанай яаман болон Бүхэроссиин хүүгэдэй “Океан” гэһэн түб энэ хэмжээ ябуулга эмхидхэнэ. Эндэ илаһан үхибүүд “Океан” лагерь ошожо, Буряадаа экологиин талаар ээлжээндэ түлөөлхэ юм.

“Эрхим һурагша- 2017” гэһэн мүрысөөнэй нээлгын баяр ёһололдо Буряад Уласай Болбосоролой болон эрдэм ухаанай сайдай орлогшо Доржи Ангархаев хабаадагшадые амаршалжа, иигэжэ хэлэбэ:

- Мүнөө эндэ аймагуудаа, һургуулинуудаа, багшанараа болон түрэлхидөө түлөөлжэ ерэһэн хабаадагшад – булта илагшад. Бултандатнай амжалта хүсэнэб. Байгаали хамгаалха талаар һурагшадые хүмүүжүүлгэ сэгнэнгүй байжа болохогүй. Хүн бүхэнэй хандасаһаа оршон тойронхи дулдыдына ха юм. Һайшаалтайнь гэхэдэ, һурагшадай бэлдэһэн түсэлнүүд дэлхэйн эгээл сэбэр Байгал далай аршалха талаар асуудалнуудта зорюулагданхай.

Энэ мүрысөөн 4 шатаһаа бүридэхэ.

Мартын 17-до мүрысөөнэй дүнгүүд элирхэ гэжэ Буряад Уласай Болбосоролой болон эрдэм ухаанай яаман мэдээсэнэ.