940
Түймэрэй аюултай хаһын урда тээ һэргылэмжын ажал ябуулагдажа байна.
Буряад Уласай аймагуудай һургуулинуудта түймэрэй аюултай хаһада зорюулагдаһан нээмэл хэшээлнүүдые ойн ажахын агентство эмхидхэнэ. Мууяын аймагта “Жемчужина Сибири” гэһэн викторина үнгэргэгдэһэн байна. Эндэ 6-дахи, 7-дохи классуудай һурагшад түрэл нютагаа, байгаалияа хэр зэргэ мэдэхэ байһанаа харуулба. “Ойн түймэр” гэһэн гаршагтай зурагуудай конкурс эмхидхэгдээ. 9-дэхи-11-дэхи классай шабинар плакадуудые бэлдэбэ. Эхин классуудай һурагшадта түймэрэй аюул тухай хөөрэжэ, мультфильмнүүдые харуулаа. Эндэ хабаадагшад дипломуудаар болон үнэтэ бэлэгүүдээр шагнагдаһан байна.
Хэжэнгэ аймагай Хүртэйн дунда һургуулида Бүхэроссиин мэдээсэлэй арга ябуулгын хэмжээндэ ойн ажахын ажалшад ногоо галдахые хориһон удхатай нээмэл хэшээлнүүдые үнгэргэбэ. Ойн түймэрэй гараа һаа, ямар хэмжээнүүд абтаха ёһотойб гэжэ һурагшадта ойн ажалшад хөөрэжэ үгэбэ. Зүбөөр түүдэг носоожо, тэрэнээ унтарааха тухай хэлэбэ. Түймэр саралгада мэргэжэлтэд хайшан гэжэ ажалаа ябуулдаг бэ гэһэн видеобуулгабаринууд һурагшадта харуулагдаа.
Иимэ хэмжээ ябуулганууд һургуулинуудай захиргаануудай болон түймэр саралгада хабаатай эмхинүүдэй үүсхэлээр хараалагдадаг байна. Дулаан уларилай тогтоходо, ойн ажалшад практическа хэшээлнүүдые үнгэргэхэ гэжэ Буряад Уласай Ойн ажахын агентство мэдээсэнэ.
