631
“Үлзы” гэһэн нигүүлэсхы сэдьхэлэй хэмжээ ябуулга апрелиин 7-до “Феникс” театрай байшан соо үнгэргэгдэхэ.
Буряад Уласай Ниигэмэй хамгаалгын болон Элүүрые хамгаалгын яамануудта хабаатай захиргаануудай хүмүүжэмэлнүүд эндэ хабаадаха юм. Буряад Уласай Ниигэмэй хамгаалгын яаман, “Матери России” гэһэн Бүхэроссиин ниитэ хүдэлөөнэй можо нютагуудай эблэл болон Зүүн Сибириин гүрэнэй соёл, урлагай дээдэ һургуули энэ хэмжээ ябуулгые эмхидхэнэ.
Эндэ сугларһан мүнгөөр “Аистёнок” гэһэн хүүгэдэй байшанда бассейн барилгые дүүргэхэ, “Малышок” гэһэн хүүгэдэй түбтэ наадаха талмай түгэсхэхэ, хуулиин наһа гүйсөөгүй үхибүүдэй Уласай социальна-реабилитационно түбтэ спортивна талмай барижа дүүргэхээр хараалагданхай.
“Үлзы” гэһэн марафон үүсхэгшэд “Справедливый мир” гэһэн олониитын эмхи болоно. Тэдэнэр олон жэлэй туршада уласай хүүгэдэй байшануудта туһа хүргэдэг юм. “Справедливый мир” гэһэн эмхиин волонтёрнууд хүүгэдэй байшануудай материальна бааза бэхижүүлгэдэ, социальна түбүүдтэ ороһон үхибүүдэй хүмүүжүүлгэ болон ниитэ ажабайдалда дадаха талаар ажал ябуулгада болон хуули ёһын асуудалнуудай талаар туһа хүргэдэг юм гэжэ Буряад Уласай Ниигэмэй хамгаалгын яаманай хэблэлэй албан мэдээсэнэ.
