649
Буряад Уласта үншэн хүүгэдэй тоо бага болоо гэжэ Буряад Уласай Ниигэм хамгаалгын яаманай хэблэлэй албан мэдээсэнэ.
2017 оной январиин 1-нэй тоо баримтануудай ёhоор, үншэн болон гэртэхинэй харууһагүй үлэһэн 5,5 мянган үхибүүд Буряад Уласта ажаһууна. Хүүгэдээ хараха эрхэгүй болоһон гү, али нарай нялха үхибүүдээ абахаяа арсаһан түрэлхидэй зэмээр 75%үхибүүд үншэн гэжэ тоологдоно. 3566 үхибүүдые гэр бүлэнүүд харууhан дороо абанхай, 1475 үхибүүдые гэр бүлэнүүд үргэжэ абанхай юм.
Үхибүүдэй үншэрхэ ушарнууд манай уласта жэл бүри үсөөн болоно. 2012 онтой жэшэхэдэ, энэ тоо 600 хүүгэдээр бага болоо. Үхибүүдые үргэжэ абаха гү, али опека бүтээжэ хүүгэдые хүмүүжүүлхэ гэһэн арганууд туһатай байна.
Хүүгэдэй гэртэ хүмүүжүүлэгдэдэг үншэн үхибүүдэй болон гэртэхинэй харууһагүй үлэһэн үхибүүдэй тоо баһа бага болоо. Уласай тоо баримтануудай ёhоор, 468 үхибүүд эндэ ороо. 2012 оной тоо баримтатай жэшэхэдэ, энэнь 393-гоор үсөөн болоо.
2016 ондо Буряад Уласта 1053 үншэн болон гэртэхинэй харууһагүй үлэһэн үхибүүд бүридхэлдэ абтаа. Тэдэнэй 742-ынь гэр бүлэнүүд үргэжэ абаа, гэртэхиндээ бусаа, бэшэниинь Буряад Уласай Ниигэм хамгаалгын яаманай тусхай эмхи зургаануудта ороо юм.
