739
Загарай аймагай Новоильинск һууринай “Преодоление” гэһэн ТОС наһатай зонуудые болон эрэмдэгтэй үхибүүдэй түрэлхидые урмашуулха, дэмжэхэ, нэгэдүүлхэ талаар горитой ажал ябуулдаг байна.
ТОС-ой эдэбхитэдэй хүсөөр “Шляпная вечеринка”, “Весенний переполох”, “Весна-2017” гэһэн мүрысөөнүүд эмхидхэгдэһэн юм. Энэ хэмжээ ябуулгануудта наһатайшуул, эрэмдэг бэетэй үхибүүд болон тэдэнэй түрэлхид эдэбхитэйгээр хабаадаа.
“Виктория” гэһэн наһатайшуулай дуунай бүлгэм энэ мүрысөөнүүдэй шэмэг болоһон байна.
ТОС-ой эдэбхитэдэй хүсөөр “Бабушка на час” гэһэн социальна түсэл бэелүүлэгдэжэ эхилбэ. Гарагай зургаанай үдэр эжынэр, гэр бүлэнүүд “Преодоление” гэһэн ТОС-ой наадалгын таһагта үхибүүдээ орхихо аргатай болобо. Наһанайнгаа амаралтада гараһан эжынэр тэдэ үхибүүдые хаража, тэдэнэртээ ном уншажа, зураг зуруулжа сүлөө сагаа үнгэргэнэ.
Энэ хэмжээ ябуулгада Загарай аймагай захиргаанай болон ниигэмэй хамгаалгын таһагай мэргэжэлтэд хабаадаһан байна.
