785
Хяагтын хүүгэдэй интернат-байшанай хүмүүжэмэлнүүд Владивосток хото ошожо, “Будущее зависит от тебя” гэһэн Бүхэроссиин урилдаанда бага футболоор хабаадаха юм.
2017 оной февралиин 21-дэ Ниигэмэй хамгаалгын яаманда хабаатай захиргаануудай хүмүүжэмэлнүүдэй дунда бага футболоор уласай 1-дэхи урилдаан үнгэрһэн байна. Буряад Уласай Ниигэмэй хамгаалгын яаман, Спортын болон залуушуулай бодолгын талаар яаман, “Мегафон” гэһэн хуби ниилүүлһэн нээмэл бүлгэмэй филиал болон Буряад Уласай футболой федераци энэ хэмжээ ябуулга эмхидхэһэн байна. Түрэлхидэй харууһагүй үлэһэн үхибүүдэй дунда үнгэргэгдэһэн урилдаанда Улаан-Үдэ хотын захиргаан болон хотын һуралсалай хороон туһа хүргэһэн байна.
Улас дотор үнгэрһэн мүрысөөндэ 8 команданууд хабаадаа. Хяагтын хүүгэдэй интернат- байшанай үхибүүд энэ шатада илажа гараһан байна.Тэдэнэр апрелиин 3-һаа 5 болотор Владивосток хотодо бага футболоор үнгэргэгдэхэ 2-дохи шатын мүрысөөндэ Буряад Уласаа түлөөлхэ юм. Эндэ Сибириин болон Алас Дурна зүгэй 12 команданууд тулалдаха. Хоёрдохи шатада илаһан команда Сочи хото ошожо, Бүхэроссиин урилдаанда хабаадаха болоно.
“Будущее зависит от тебя” гэһэн мүрысөөндэ илаһан команда Лондон хото ошожо, “Арсенал” гэһэн футболой командын ахамад һоригшо Арсен Венгер гэгшэтэй, Англиин футболой ододтой уулзаха, яагаад тэдэнэр нааданда бэеэ һориноб гэжэ хараха арга боломжодо хүртэхэ юм.
Буряад Уласай Спортын болон залуушуулай бодолгын талаар яаман Владивосток хото ошохо командада туһа хүргэхэ.
2013 ондо Хэжэнгэ аймагай “Илалта” гэһэн команда Сочи хотодо үнгэрһэн Бүхэроссиин урилдаанда илаһан юм. Удаань Лондон ошожо, “Арсенал” гэһэн командын гэшүүдтэй уулзажа, наадыень хараһан байна гэжэ һануулнабди.
