686
Ойн түймэрнүүд Буряад Уласта эхилбэ.
Мартын 31-дэ Загарай аймагта хагда галдаһанһаа боложо, энэ хабарай түрүүшын ойн түймэр гараһан байна. Амаралтын үдэрнүүдтэ Ярууна аймагта Ородой Холбоото Уласай Баталан хамгаалгын яаманай Буряадтахи харьяата газар дайдада түймэр гаража, үдэрэй туршада тэрэ унтараагдаһан байна. Апрелиин 3-най үглөөгүүр Бэшүүр болон Загарай аймагуудта гараһан 8 түймэр тухай мэдээн орожо, 4-ниинь усадхагдаа. 150 га газарай талмай галда абтаа.
Түймэр унтараалгада ой хамгаалгын албанай 100-һаа дээшэ мэргэжэлтэд болон ажаһуугшад, 19 түймэр саралгын машина болон 7 тракторнууд хабаадаа. Түймэрэй аюултай хаһа Бэшүүр, Хэжэнгэ, Загарай аймагта тохёолдоод байна.
2016 ондо Баргажанай Адагай ойн талмайда апрелиин 8-най үдэр түймэрэй гараһан тухай мэдээн бүридхэлдэ абтагдаһан юм.
Тала дайдаар хагда, поли дээрэ үлэһэн ногоо галдаха, гал түүдэг носоохо хорюултай гэжэ Буряад Уласай ойн ажахын албан мэдээсэнэ. Үшөө тиихэдэ, харгын, түмэр харгын хажуугаар ногоо галдаха, түүдэг носоохо, модо отолһоной һүүлээр үлэһэн гэшүүһэ галдаха, хатанхай ой модо, һөөг бургааһа орхихо баһал хоригдоно.
Эдэ дүримүүдтэ хайша хэрэгээр хандабал, хүнүүд 3 мянгаһаа 4 мянган түхэриг хүрэтэр, албанай түлөөлэгшэд – 15 000-һаа 25000 түхэриг хүрэтэр, юридическэ нюурнууд – 150 мянганһаа 250 мянган түхэриг хүрэтэр ялада тохогдохо юм. Хабартаа хагда галдаад, тэрэнээ унтараангүй ябашаха ушарһаа ехэнхи ойн түймэрнүүд гарадаг юм. Тэрэниие усадхахань ехэ хүндэ байдаг. Юундэб гэхэдэ, ехэ талмайда гараһан гал унтараахань хэсүү.
Түймэрэй гараһан тухай дүтын ойн ажахын албанда гү, али (83012) 20-44-44 гэһэн утаһаар дуулгажа байгыт гэжэ ойн харуулшад мэдүүлнэ.
