805
Буряад Уласай 300-һаа дээшэ һургуулинууд бүхэроссиин “Сделаем вместе” гэһэн байгаали хамгаалгын акцида хабаадаха юм.
2017 он – байгаали хамгаалгын жэл гэжэ бултанда мэдээжэ. Тиимэһээ Ородой Холбоото Уласай бүхы һургуулинуудта энээндэ зорюулагдаһан хэмжээ ябуулганууд үнгэргэгдэнэ. Үхибүүдые, залуушуулые байгаалидаа гамтайгаар хандажа ябаха, оршон тойронхи байдалда харюусалгатай байха гэһэн зорилготой энэ түсэл бэелүүлэгдэхэ юм.
Энэ акци Крымдэ эхилһэн байна. Хүүгэдэй“Артек” гэһэн лагерьта Гүрэнэй Дүүмын болбосоролой болон эрдэм ухаанай хорооной түрүүлэгшын орлогшо, “Экологическое образование” гэһэн һалбариин шэглүүлэгшэ Геннадий Онищенко байгаали хамгаалгада зорюулагдаһан түрүүшын хэшээл үнгэргэбэ. Эдэ хэшээлнүүдэй һүүлээр эмхидхэгшэд классһаа гадуур хэмжээ ябуулганууд болон мүрысөөнүүдые үнгэргэхэ юм.
Үдэр ерэхэ бүри хабаадагшадай тоо олон боложол байна.
Буряад Уласта “Сделаем вместе” гэһэн акцида хабаадаха тухайгаа 337 һургуулинууд мэдүүлгэ орууланхай. Апрелиин 10 болотор энэ хэмжээ ябуулгада хабаадааха тухай мэдүүлгэнүүдые һургуулинууд оруулха аргатай.
Мартын 15-һаа майн 10 болотор “Зелёная акция” гэһэн байгаали хамгаалгын хэмжээ ябуулга үнгэргэгдэхэ. Эндэ хабаадагшад оршон тойронхи байдал болбосон түхэлтэй болгохо, макулатура суглуулха, ой модо һуулгаха, байгаали хамгаалгын баярай наадануудые эмхидхэхэ, дүхэриг шэрэнүүдые үнгэргэхэ түсэбтэй.
Байгаалиин нөөсэнүүдэй яаманай сайтһаа гэрэл зураг абтаба.
