967
Буряад Уласай хүдөө ажахы үйлэдбэрилэгшэд хабарай тарилгын үедэ гүрэнэй дэмжэлгэдэ саг соогоо хүртэхэ.
Буряад Уласта хабарай тарилгын ажалда бэлэдхэл эхилээ. Энэ хэрэгтэ гаргашалагдаха мүнгэн 733 млн. түхэриг болоно.
Мүнөө дээрээ Ородой Холбоото Уласай Хүдөө ажахын болон эдеэ хоолой яамантай 9 хэлсээн баталагдаһан байна. “Энэ хэлсээнэй ёһоор хүдөө ажахы үйлэдбэрилэгшэд саг соогоо гүрэнэй тэдхэмжэдэ хүртэхэ юм. Үшөө тиихэдэ, тэдэнэр хүнгэлэлтэтэй урьһаламжа абаха аргатай. Ородой Холбоото Уласай Хүдөө ажахын болон эдеэ хоолой яаманда 2016 оной ган гасуурһаа хохидоһон Буряад Улас болон Үбэр Байгалай хизаарта туһа хүргэхэ тухай асуудал шиидхэгдэжэ байна,”- гэжэ Буряад Уласай Хүдөө ажахын болон эдеэ хоолой яаманай хэблэлэй албан мэдээсэнэ.
Һүүлэй гурбан жэлдэ ган гасуур болоһон ушарһаа мүнөө жэлэй түсэбөөр малай тэжээлэй таряа һуулгаха талмай ехэ болгоожо, орооһо таряа багаар һуулгаха юм. Уридшалһан мэдээгээр, ажахынууд орооһо таряа 69,3 мянган га газарта, малай тэжээлэй таряа – 68 мянган га, хартаабха – 14,4 мянган га, бусад огородой эдеэ – 2,6 мянган га талмайда тарихаар түсэблэгдэнхэй. Бүхыдөө 154,3 мянган га талмайда талха таряан таригдаха, энэнь 2016 онойхиһоо 5,9 мянган гектараар ехэ.
Хабарай тарилгын хаһын эхилээдүй байхада, уласай мал үүсхэбэрилдэг ажахынууд 137,7 млн түхэриг тэдхэмжэдэ хүртэхэ юм. Ороһон мүнгэн хони, ямаа, мяханай үүлтэрэй бодо мал үүсхэбэрилгэдэ дамжуулагдаха.
