749
2017 ондо Буряад Уласай хүдөө ажахын хүдэлмэрилэгшэд таряа талхаяа аюулһаа даадхаха аргатай.
“Буряад Уласай Хүдөө ажахын болон эдеэ хоолой яаман болон даадхалгын бүлгэм таряа талхаяа аюулһаа даадхаха тухай хэлсээнүүдые бэлдэжэ, тэрэнь түгэсхэлэй шатада,”- гэжэ Хүдөө ажахы даадхагшадай Үндэһэтэнэй эблэлэй толгойлогшо (НСА) Корней Биждов хэлэбэ.
Буряад Уласай Хүдөө ажахын болон эдеэ хоолой сайдай орлогшо Юлия Дагданова НСА эмхиин хүтэлбэрилэгшэдтэй уулзаһан байна. Тэдэнэр 10 мянган га газарай талмай аюулһаа даадхаха талаар урид бэлдэгдэһэн харгын карта бэелүүлгын шатанууд тухай хэлсэбэ.
Буряад Уласай хүдөө ажахы эрхилэгшэдтэ уласай мүнгэн һанһаа таряа тариха һалбарида хэлсээнэй ёһоор даадхалгын шангай нэгэ хэды хубинь түлэгдэдэг юм гэжэ һануулнабди. Байгаалиин уларилай онсо байдалһаа дулдыдаг нютаг можонуудта агростраховани бэелүүлхэ гээшэ шухала асуудалнуудай нэгэн юм гэжэ Буряад Уласай Хүдөө ажахын болон эдеэ хоолой сайдай орлогшо Юлия Дагданова хэлэнэ.
“Буряад Уласта ган гасууртай жэлнүүдтэ зуугаад млн. түхэригэй хохидол үзэгдэдэг. Даадхалгын хэлсээнүүдые баталжа, хүдөө ажахын үйлэдбэриие заатагүй хамгаалха шухала гэжэ ойлгохо ёһотой. Жэл бүри гүрэн түрэ хүдөөгэй ажахынуудай хохидолдо ороходо, уласай бюджедһээ үныень хүсэлдүүлжэ шадахагүй. Тиимэһээ гүрэнэй дэмжэлгэтэй агростраховани шухала байха юм. 2017 ондо таригдаха таряа талханай нэгэ хэды хубииень даадхаха гэжэ шадалаараа оролдообди,”- гэжэ Юлия Дагданова хэлэбэ.
2015, 2016 онуудта Буряад Уласта ган жэлнүүд боложо, онсо байдал тохёолдоһон юм. 2017 ондо Ородой Холбоото Уласай Засагай газарай захиралтаар Буряад Уласай газар дайда хүдөө ажахы үйлэдбэрилгэдэ таарамжагүй нютаг можонуудай тоодо оробо.
2016 ондо Буряад Уласай Хүдөө ажахын болон эдеэ хоолой яаман болон НСА энэ асуудалаар шиидхэбэри абаха гэжэ суг хүдэлхэ тухай хэлсээ баталһан байна. Эдэнэр 2017 оной гүрэнэй дэмжэлгэтэйгээр хүдөө ажахы даадхаха харгын карта бэлдэһэн байна.
Ородой Холбоото Уласай Хүдөө ажахын болон эдеэ хоолой яаман, Мүнгэн һангай яаман, Холбоото Уласай даадхалгын хиналтын албан болон Бүхэроссиин даадхагшадай эблэлэй дэмжэлгээр Хүдөө ажахы даадхагшадай эблэл 2007 ондо байгуулагдаһан юм.
Мүнөө дээрээ тэрэнэй тоодо 24 даадхалгын компанинууд ородог юм. Хамтын уставной зөөринь 75 млрд. түхэриг. НСА эблэл хүдөө ажахы гүрэнэй дэмжэлгэтэйгээр аюулһаа аршалха хэрэгтэ бүхы гэшүүдэй дундаа харилсаха талаар ажал ябуулдаг, даадхал бэелүүлхэ талаар яагаад ажал ябуулхаб гэһэн асуудалаар Ородой Холбоото Уласай гүрэнэй засаг болон нютаг можонуудай хуули тогтоолгын, гүйсэдхэхы эмхинүүдтэ туһа хүргэдэг юм.
