642
Улаан-Үдэдэ “Вместе против террора” гэһэн митингдэ 2 мянган хүн суглараа.
Энэ хэмжээ ябуулгада Буряад Уласай Толгойлогшын уялга саг зуура дүүргэгшэ Алексей Цыденов болон залуушуулай эмхи зургаанууд, тамиршад, волонтёрнууд болон юрын зон олоороо сугларһан байна.
Санкт-Петербург хотодо болоһон һүрөөтэй үйлэ хэрэгтэ гашуудал шаналалаа мэдүүлхэеэ, тохёолдоһон байдалда тэдэниие дэмжэхэ гэһэн уйдхар гашуудалта митинг нэгэ минутын туршада абяагүй зогсолгоһоо эхилбэ.
Буряад Уласта ОНФ-эй гүйсэдхэхы хорооной хүтэлбэрилэгшэ Игорь Марковец иигэжэ хэлэбэ:
- Илалта туйлаһан үбгэ эсэгэнэрэйнгээ дурасхаалые мүнхэлэн, мүнөө үеын алан һүрдэгшэдһөө айхагүй, зоригтой зон эндэ суглараа. Хүнүүдые айлгажа, гэрһээ гарахыень болюулжа, ганса гансаарнь хюдаха гэһэн алууршадай хорото һанал бэелүүлэгдэхэгүй. Манай арадай ухаан бодол, эрмэлзэл, хүсэл ,этигэл нугаршагүй, эбдэршэгүй. Нэгэн мэтэ жагсаалда зогсожо, шуһата алан һүрдэгшэдтэ дохихогүйбди. Ородой Холбоото Уласай Толгойлогшо, Ород гүрэн, Холбоото Уласай арад хэтын хэтэдэ нэгэдэнхэйбди.
Тамиршадай, волонтёрнуудай, залуушуулай эмхинүүдэй түлөөлэгшэд үгэ хэлэжэ, бүгэдэ нэгэдэжэ, хүсэеэ харуулха гэжэ уряалба. “Рысь” гэһэн бэдэрэлгын бүлэгэй ударидагша Александр Васюткин иигэжэ хэлэбэ:
- Үбгэ эсэгэнэрэйнгээ баатаршалга, түүхэеэ хододоо һанажа ябаха ёһотойбди. 2017 оной апрелиин 3-най үйлэ хэрэгүүдые мартангүй, эб нэгэн байха ёһотойбди.
“Буряад Уласай залуушуулай эблэл” ниитын эмхиин түрүүлэгшэ Амгалан Данзанов Санкт-Петербургда болоһон хорото үйлэ хэрэгтэ наһа бараһан хүнүүдэй дүтын зондо шаналалаа мэдүүлжэ, уйдхар гашуудалай тэмдэг болгон, сагаан шаарнуудые табиба.
Буряад Уласай Толгойлогшын Захиргаан болон Засагай газарай үндэһэ яһатанай хоорондын харилсаануудай болон эрхэтэдэй эдэбхи хүгжөөлгын хороон, “Буряад Уласай залуушуулай эблэл” гэһэн ниитын эмхи, Буряад ороной арадуудай «Эб найрамдалай байшан» эблэл” ниитын эмхи энэ хэмжээ ябуулга үнгэргэбэ.
Буряад Уласай Дотоодын хэрэгүүдэй яаманай мэдээсэһээр, митингдэ 2 мянган хүн хабаадаһан байна.
