​Дайсанһаа далтирхагүй хүсэеэ харуулба

Улаан-Үдэдэ Линховоиной нэрэмжэтэ Театральна талмай дээрэ “Терророй урдаһаа хамтадаа” гэһэн митингдэ 2 мянган хүн суглараа. Энэ хэмжээ ябу­улгада Буряад Уласай Толгойлогшын уялга саг зуура дүүргэгшэ Алексей Цыденов бо­лон залуушуулай эмхи зургаанууд, тамир­шад, волонтёрнууд болон юрын зон олоо­роо сугларһан байна.

Санкт-Петербург хотодо болоһон һүрөөтэй үйлэ хэрэгтэ шаналал гашуудалаа мэдүүлхэеэ, тохёолдоһон байдалда тэдэниие дэмжэхэ гэһэн уйдхар гашуудалта митинг нэгэ мину­тын туршада абяагүй зогсолгоһоо эхилбэ.

Буряад Уласта ОНФ-гэй гүйсэдхэхы хороо­ной хүтэлбэрилэгшэ Игорь Марковец иигэжэ хэлэбэ:

- Илалта туйлаһан үбгэ эсэгэнэрэйнгээ дурасхаалые мүнхэлэн, мүнөө үеын алан һүрдөөгшэдһээ айхагүй, зоригтой зон эндэ суглараа. Хүнүүдые айлгажа, гэрһээ гарахы­ень болюулжа, ганса гансаарнь хюдаха гэһэн эдэнэй хорото һанал бэелүүлэгдэхэгүй. Манай арадай ухаан бодол, эрмэлзэл, хүсэл, этигэл нугаршагүй, эбдэршэгүй. Нэгэн мэтэ жагсаал­да зогсожо, алан һүрдөөгшэдтэ дохихогүйбди.

Ородой Холбоото Уласай чемпионадта хабаадажа байһан буряад ушуистнууд энэ һүрөөтэ үйлэ хэрэгэй үедэ Москва хото­до байһан юм. Оло дахин дэлхэйн чемпион болоһон Владимир Марковай хэлэһээр, бүхы гүрэнэй ажаһуугшадые энэ хорото ябадал хүлгөөбэ.

- Манай олон нүхэд Санкт-Петербург хото­до ажаһуудаг. Урилдаанай үедэ тэдэ нүхэдтөө хонходожо, тэдэнэйнгээ элүүр мэндыень мэдэжэ байгаабди. Маанадые энэ гашуудал нэгэдүүлээ. Саашадаа иимэ уйдхар гашуудал тохёолдохогүй бэзэ гэжэ найданаб,- гэжэ мэ­дээжэ тамиршан хэлэбэ.

“Рысь” гэһэн бэдэрэлгын бүлэгэй удари­дагша Александр Васюткин иигэжэ хэлэбэ:

- Үбгэ эсэгэнэрэйнгээ баатаршалга, түүхэеэ хододоо һанажа ябаха ёһотойбди. 2017 оной апрелиин 3-ай үйлэ хэрэгүүдые мартангүй, эб нэгэн байха ёһотойбди.

“Азия спорт” гэһэн түбэй волонтёр Злата Игнатьевагай хэлэһээр, метрогой поездын нэгэ вагон соо боомбын тэһэрхэдэ, хүн зон мэгдэжэ, айжа, юумэ ойлгохоо болишоод, урагша хойшоо харайнгүй, өөр тухайгаа бодонгүй, нэгэдэжэ, бэе бэедээ туһа хүргэжэ байгаа.

- Маанадые уйдхар гашуудал нэгэдүүлээ бэшэ, харин хүнэй хүнгэн бэшэ байдалда оро­од байхада, тэрэ гашуудалынь хубаалдаха нигүүлэсхы сэдьхэл маанадые нэгэдүүлбэ, - гэжэ тэрэ хэлэбэ.

“Буряад Уласай залуушуулай эблэл” нии­тын эмхиин түрүүлэгшэ Амгалан Данзанов Санкт-Петербургда болоһон хорото үйлэ хэ­рэгтэ наһа бараһан хүнүүдэй дүтын зондо ша­налалаа мэдүүлбэ. Удаань уйдхар гашуудалай тэмдэг болгон, сагаан шаарнуудые залуушу­ул огторгойдо табиба. Эндэ сугларагшадтай хамта Буряад Уласай Толгойлогшын уялга саг зуура дүүргэгшэ Алексей Цыденов байлсаба:

- Һүүлэй үедэ Ород гүрэн дотор иимэ му­ухай үйлэ хэрэгүүдэй олон болоһонииень халагламаар. Ородой Холбоото Уласай арад зониие айлгаха, һүрдөөхэ гэһэн туршалгану­уд мүнөөнэй түүхэдэ үзэгдэдэг гээшэ ааб даа. Харин бидэнэй нэгэдэжэ, дайсанай урдаһаа эсэргүүсэхэ шадалтай байһыемнай түүхэ гэр­шэлнэ. Дайсад баригдажа, энэ үйлэ хэрэг ту­хайгаа шаналха байха, - гэжэ Алексей Цыде­нов хэлэбэ.

Ород гүрэн дотор болоһон гашуудалта үйлэ хэрэгтэ хохидоһон арад зонтой Буряад Уласай ажаһуугшад эб нэгэн боложо, алан һүрдөөгшэдтэ эсэргүүсэхээр бэлэн байһанаа мэдүүлбэ ха юм.

Анна Огороднигой гэрэл зураг

Эндэ сугларагшадтай хамта Буряад Уласай Толгойлогшын уялга саг зуура дүүргэгшэ Алексей Цыденов байлсаа

Анна Огороднигой гэрэл зураг

Митингдэ 2 мянган хүн суглараа

Анна Огороднигой гэрэл зураг

Митингын үедэ