730
Англи хэлээр үнгэргэгдэһэн Бүхэроссиин олимпиадада Улаан-Үдын 3-дахи һургуулиин 11-дэхи класссай һурагша эрхимлэбэ.
Ородой Холбоото Уласай 67 нютаг можонуудай ахалагша классуудай 212 һурагшад англи хэлээр үнгэргэгдэһэн Бүхэроссиин олимпиадын түгэсхэлэй шатада апрелиин 3-9-дэ хабаадаба.
Волгоград хотын гүрэнэй ниигэмэй-багшанарай дээдэ һургуулида энэ хэмжээ ябуулга эмхидхэгдэбэ. Буряад Уласые Улаан-Үдын 3-дахи лингвистическэ гимназиин 11-дэхи классай һурагша Ольга Тумурова түлөөлбэ.
- Бэлиг талаантай үхибүүдые бэдэржэ, тэдэнэрэй шадабаринуудыень улам хүгжөөхэ, Ородой эрхим дээдэ һургуулинуудта һурахадань дэмжэхэ гээшэ олимпиадануудай гол зорилго болоно. Долоон хоногой туршада үхибүүд эрдэм мэдэсэеэ шалгаһан байна. Тэдэнэр хэр зэргэ англи хэлэнэй лексикэ, грамматика, бэшэгэй дүримүүдые мэдэхэ, англи хэлээр хөөрэлдэжэ шадаха байһанаа харуулаа,- гэжэ Буряад Уласай Болбосоролой болон эрдэм ухаанай яаман мэдээсэнэ.
Олимпиадын дүнгүүдээр Ольга Тумурова 115 балл абажа, тусхай шанда хүртэһэн байна.
2016 ондо Смоленск хотодо Уильям Шекспирэй зохёолнуудаар үнгэргэгдэһэн мүрысөөндэ түрүүлжэ, хоёр долоон хоногой туршада Великобритани ошожо һураха шанда хүртэһэн юм.
