808
Ородой Холбоото Уласай Засагай газарай түрүүлэгшэ Дмитрий Медведев Буряад Уласта ган гасуурай хойшолонгуудые усадхахын түлөө 300 млн. түхэриг һомологдохо тухай тогтоол гаргаһан байна. Энээн тухай Новокижингинск һууринай ажаһуугшадтай уулзаха үедөө Буряад Уласай Толгойлогшын уялга саг зуура дүүргэгшэ Алексей Цыденов дуулгаба.
- Буряад Уласта үзэгдэһэн ган гасуурай хойшолонгуудые усадхахын түлөө 300 млн. түхэриг мүнгэн һомологдоо гэжэ үсэгэлдэр үдэшэ мэдээжэ болоо. Тарилгын ажалнуудые үнгэргэхэ ажахынуудта энэ туһатай байха,- гэжэ Алексей Самбуевич хэлэбэ.
2016 оной ган гасуурта 101 ажахы, 69,7 га талмайда талха таряан хохидоһон байна.
- Ажахы бүхэнэй гарза тоолохо, мэргэжэлтэ шүүбэри үнгэргэхэ дансанууд бэлдэгдэһэн байна. Ажахынууд 309 млн.түхэригэй гарзада ороһон байна. Федеральна хуулиин зарим тэды хизаарлалгаһаа боложо, энэ мүнгэн үгтэхэгүй гэжэ айгаабди. Тиигэбэшье энэ тэдхэмжэдэ хүртэхэ гэжэ оролдообди, - гэжэ Буряад Уласай Хүдөө ажахын болон эдеэ хоолой яаманда хэлэбэ.
