793
Буряад Уласай Толгойлогшын уялга саг зуура дүүргэгшэ Алексей Цыденов Дээдэ-Хэжэнгын дунда һургуулида тамирай байшанай барилгые дүүргэхэ хэрэгтэ туһалха юм.
2016 ондо нютагай һуури бүтэсэ (инфраструктура) хүгжөөхэ мүнгэн һанһаа болон ТОС-ой эдэбхитэдэй хүсөөр суглуулһан мүнгөөр тамирай байшанай барилга эхилһэн байна. Тэрэ ажал дүүргэхын тула үшөө 10 млн. түхэриг хэрэгтэй. Буряад Уласай Толгойлогшын уялга саг зуура дүүргэгшэ Алексей Цыденов энэ барилга дүүргэхэ хэрэгтэ туһалхабди гэжэ найдуулаа.
Буряад Улас дотор Дээдэ-Хэжэнгын һургуули эгээн түрүүн нээгдэһэн һургуулинуудай нэгэн юм. 2017 ондо энэ һургуули 100 жэлэйнгээ ойн баяр угтаха. Ойн баяр тэмдэглэхэеэ бэлдэжэ, һургуулиин байшан заһабарилагдаһан байна.
Дээдэ-Хэжэнгын дунда һургуулиин заһабарилгада 17 млн. түхэригһөө дээшэ мүнгэн һомологдоо.
Дулаан, һаруул класссууд соо үхибүүд ном шудалдаг һаа, бэеэ һорихо, физкультурын хэшээлнүүдые үнгэргэхэ дулаан байшангүй юм. Һургуулиингаа ойн баяртай дашарамдуулан, Эдэрмэгэй ажаһуугшад өөдынгөө хүсөөр тамирай байшан бариха гэжэ шиидэһэн байна. Тамирай байшанай ехэнхи хубинь бодхоогдоо. Харин энээниие ашаглалгада тушаахын тула, үшөө 10 млн. түхэриг гаргашалагдаха болоно.
- Энэ асуудал Арадай Хуралай апрелиин сессидэ оруулжа, буянтай ажал эхилһэн хүнүүдтэ туһа хүргэжэ шадаха байхабди, -гэжэ Буряад Уласай Толгойлогшын уялга саг зуура дүүргэгшэ Алексей Цыденов хэлэбэ.
