730
Ажаһуугшадай байгаалида хайша хэрэгээр хандаһанһаа, һалхитай, хура бороогүй уларилай тогтоһонһоо боложо, ойн түмэрэй тоо олошороо. Амаралтын үдэрнүүдтэ һалхин эршэдэхэ. Тиимэһээ ойн харуулшад түймэрэй гарахагүйн тула һэргылэмжын ажал үргэнөөр ябуулна.
Үнгэрһэн үдэрэй туршада Улаан-Үдэ шадар, Байгал шадар болон Зэдэ аймагуудта түймэр болоһон байна. Бүхыдөө ойн харуулшад болон ажаһуугшад 40 га талмайда түймэрэй гараһан 5 газарта гал унтарааба.
Апрелиин 14-нэй мэдээгээр, Буряад Уласта 68 га талмайда гараһан 7 ойн түймэрнүүд бүридхэлдэ абтаһан байна. Тэдэнэй гурбаниинь унтараагдаа, 4-ниинь үшөө соробхилһоор. Сэлэнгэ, Захаамин, Ивалга, Зэдэ, Бабанта болон Ярууна аймагай Баталан Хамгаалгын яаманай газар дээрэ түймэрнүүд гаранхай.
Түймэр саралгада 110 ойн харуулшад, ажаһуугшад, болон 25 түймэр саралгын техникэ хабаадалсана.
Түймэрэй аюултай хаһа Сэлэнгэ, Хяагта, Ивалга, Захаамин аймагуудта, Хүйтэнэй ойн талмайда эхилбэ. Энээнһээ урид Бэшүүр, Загарай, Тарбагатай, Хэжэнгэ, Зэдэ аймагуудта болон Витимэй, Бабантын болон Баргажанай ойн талмайда түймэр гараһан байна.
Түймэрэй аюултай хаһын эхилһэнһээ хойшо түймэрэй гараһан тухай 40 мэдүүлгэ баримталагдаа. Галда абтаһан газарай талмай 7 мянган га болоо. Буряад Уласта түймэрэй һэргылэмжын онсо байдал соносхогдонхой.
Түймэрэй һэргылэмжын онсо байдалай соносхогдоһон үедэ дүрим эбдэһэн зонуудта болон эмхи зургаануудта захиргаанай яла тохогдохо юм. Хүнүүд 4 мянгаһаа 5 мянган түхэриг хүрэтэр, албанай түлөөлэгшэд – 20000-һаа 40000 түхэриг хүрэтэр, юридическэ нюурнууд – 300 мянганһаа 500 мянган түхэриг хүрэтэр ялада түлэхэ юм. Тала дайдаар хагда, поли дээрэ үлэһэн ногоо галдаха, гал түүдэг носоохо хорюултай гэжэ Буряад Уласай ойн ажахын албан мэдээсэнэ. Үшөө тиихэдэ, харгын, түмэр харгын хажуугаар ногоо галдаха, түүдэг носоохо, модо үйлэдбэриин һүүлээр үлэһэн гэшүүһэ галдаха, хатанхай ой модо, бургааһа орхихо баһал хоригдоно.
Түймэрэй гараһан тухай дүтын ойн ажахын албанда гү, али (83012) 20-44-44 гэһэн утаһаар дуулгажа байгыт гэжэ ойн харуулшад мэдүүлнэ.
