708
Улаан-Үдэдэ “Дети на дороге – учитель в тревоге” гэһэн хотын мүрысөөнэй дүнгүүд согсологдобо.
Улаан-Үдын һуралсалай эмхи зургаануудай багшанарай дунда харгын дүрим заалгаар мүрысөөнэй түгэсхэлэй шата үнгэргэгдэбэ. Һурагшадай харгын дүрим сахижа, аюулда оронгүй ябахын тула багшанарай энэ талаар зааха дүй дүршэл баяжуулха зорилготой энэ хэмжээ ябуулга жэл бүри эмхидхэгдэнэ.
Шэлэн абалгын шатада багшанар нээмэл хэшээлнүүдые үнгэргэһэн байна. Удаань Советскэ районой Хүүгэдэй урлагай байшанда үнгэргэгдэһэн түгэсхэлэй шатада 8 багшанар хабаадаба. Эдэнэр ажал тухайгаа зохёохы даабаринуудые дүүргэһэн байна.
«Үхибүүдтэ харгын дүрим заадаг эрхим багша» гэһэн нэрэ зэргэдэ 65-дахи дунда һургуулиин багша Ольга Фролова хүртэбэ. Хоёрдохи һуури – 43-дахи һургуулиин эхин классуудай багша Эржена Цырендоржиева, гурбадахи һуури – нэмэлтэ һуралсалай багша Сэндэма Бадмажапова гэгшэд эзэлбэ. Мүрысөөндэ хабаадаһан багшанар грамота болон бэлэгүүдээр шагнагдаба.
