768
Буряад Уласай Толгойлогшын уялга саг зуура дүүргэгшэ Алексей Цыденов Ивалга аймагай ажаһуугшадтай уулзажа, эдэй засагай болон ниигэмэй талаар хүгжэлтэ тухай асуудал зүбшэн хэлсэхэ юм. Тэрэ Буряад Уласһаа холо ойро мэдээжэ болоһон омоли загаһа болбосоруулдаг, 100-һаа дээшэ хүнүүдые ажалаар хангадаг “Байкал” гэһэн үйлэдбэридэ хүрэхэ. Буряад Уласай Засагай газарай дэмжэлгээр Хойто бэе нютагай ТОС-ой барижа эхилһэн соёлой- тамирай түбтэ хүрэжэ, Алексей Цыденов ажалыень хараха юм.
Буряад Уласай Толгойлогшын уялга саг зуура дүүргэгшэ Засагай газарай түлөөлэгшэдтэй хамта Ивалга һууринда “Рассвет” гэһэн ТОС-ой ажалтайнь танилсаха байна. Юундэб гэхэдэ, эндэхи нютагай хүтэлбэри уласай мүрысөөндэ илажа, хүртэһэн мүнгэн шангаараа һууринаа болбосон түхэлтэй болгохо ажал ябуулна. Тэдэнэр заһабарилгын ажал, ниигэмэй программмануудые бэелүүлнэ.
Ородой Холбоото Уласай хүдөөгэй эрхим һургуулинуудай нэгэн болохо Ивалгын 1-дэхи һургуулида, заһабарилагдахаар болоhон 2-дохи һургуулида, аймагай түбэй эмнэлгын газарта болон соёлой байшанда Алексей Самбуевич хүрэхэ түсэбтэй.
Буряад Уласай Толгойлогшын уялга саг зуура дүүргэгшэ Алексей Цыденов ТОС-уудай эдэбхитэдтэй, болбосоролой, хүдөө ажахын, анагааха ухаанай хүдэлмэрилэгшэдтэй, сомонуудай даргануудтай, олзын хэрэг эрхилэгшэдтэй болон ажаһуугшадтай уулзаха юм. Эдэ уулзалгануудай үедэ заншалта ёһоор, Алексей Самбуевич асуудалнуудта харюусажа, олоной дурадхалнуудые шагнаха юм.
Анна Огороднигой гэрэл зураг.
