930
Улаан-Үдэдэ апрелиин 24-28-най үдэрнүүдтэ “Буряад Уласай эрхим багша-2017” гэһэн мүрысөөн эмхидхэгдэхэнь.
Багшанарай дүй дүршэл баяжуулха, дэлгэрүүлхэ зорилготой энэ мүрысөөн жэл бүри үнгэргэгдэдэг юм. Энэ удаа Буряад Уласай мүрысөөнэй түгэсхэлэй шатада аймагуудаа түлөөлһэн 28 эрхим багшанар хабаадаха.
“Эрхим багша-2017” гэһэн мүрысөөн Улаан-Yдын 65-дахи һургуулида үнгэргэгдэхэ байна. Түрүүшын үдэр багшанар “Методическа семинар”гэһэн шатада хаба шадалаа туршалсаха юм. Энэл үдэр Буряад Уласай Болбосоролой болон эрдэм ухаанай сайдай уялга дүүргэгшэ Баир Жалсановтай, һурагшадтай багшанар уулзаха. Удаань“Эрхим багша- 2017” гэһэн конкурс нээлгын баяр ёһолол үнгэргэгдэхэ юм.
Апрелиин 25-най үдэр “Хэшээл” гэһэн удаадахи шатада багшанар хабаадаха. Эндэ багшанар хэшээлнүүдые үнгэргэжэ, өөhэдөө шүүмжэлэл хэжэ, жюриин гэшүүдэй асуудалнуудта харюусаха болоно. Тэрэнэй һүүлээр заочно турай “Методическа портфолио”болон “Багша- профи” гэһэн шэглэлнүүдэээр дүнгүүд согсологдожо, 2-дохи турта хабаадаха 15 багшанар элирүүлэгдэхэ юм.
Апрелиин 26-да мүрысөөндэ хабаадагшад мастер-классуудые харуулжа, “Болбосоролой түсэл” (“Образовательный проект”) гэһэн шатада урилдаха болоно. Эндэ багшанар бүлэгүүдтэ хубааржа, түсэл бэлдэжэ, тэрэнээ хамгаалха юм. Апрелиин 27-до “Учитель-Лидер” гэһэн гурбадахи тур эхилжэ, “Болбосоролой бодолгоор түхэреэн шэрээ” гэһэн хэмжээ ябуулга эмхидхэгдэхэ. Тэрэнэй удаа конкурсын дүнгүүд согсологдожо, Буряад Уласай эрхим багша элирүүлэгдэхэ юм.
Апрелиин 28-да “Буряад Уласай эрхим багша- 2017” гэһэн мүрысөөнэй түгэсхэлдэ зорюулагдаһан баяр ёһололой хэмжээ ябуулга Буряадай гүрэнэй ехэ һургуулида үнгэргэгдэхэ. Энэ үдэр Буряад Уласай Толгойлогшын уялга саг зуура дүүргэгшэ Алексей Цыденов багшанартай уулзаха юм.
“Буряад Уласай эрхим багша” гэһэн мүрысөөн “Ородой Холбоото Уласай эрхим багша” гэһэн Бүхэроссиин мүрысөөнэй уласай хэмжээнэй шата болоно гэжэ һануулнабди. “Буряад Уласай эрхим багша” гэһэн нэрэ зэргэдэ хүртэһэн хабаадагшада мельхиороор бүтээгдэһэн, шүрөөр шэмэглэгдэһэн бадма сэсэг барюулагдаха.
“Буряад Уласай эрхим багша-2016” гэһэн нэрэ зэргэдэ 47-дохи һургуулиин географиин багша Елена Матхеева хүртөө гэжэ һануулнабди.
Буряад Уласай Болбосоролой болон эрдэм ухаанай сайтһаа гэрэл зураг абтаба.
