​Эхин классуудай эдир һурагшад түрүүлбэ

Буряад Уласай түлөөлэгшэд “Дважды два” гэһэн уласхоорондын олимпиадада хабаадажа, шагналда хүртэбэ.

“Дважды два” гэһэн олимпиадада Ород, Серби, Болгари, Украина, Эстони болон Япони гүрэнүүдһээ 9 мянганһаа дээшэ эхин классуудай һурагшад хабаадаба. Ород гүрэн дотор эмхидхэгдэһэн хэмжээ ябуулгада Улаан-Үдэ, Москва, Санкт-Петербург, Белгород, Воронеж, Нижний Новгород болон бусад хотонуудай эдир һурагшад эрдэм мэдэсэеэ шалгаба.

Эхин классуудай һурагшадай дунда эмхидхэгдэһэн Уласхоорондын олимпиадада Буряад Уласай зуугаад һурагшад хабаадаһан байна. Тэдэнэй 16-ниинь түрүү һууринуудые эзэлжэ. шагналда хүртэбэ. Эдэнэр Улаан-Үдын 1-дэхи һургуулиин, 3-дахи болон 59-дэхи гимназинуудай болон Буряад Уласай Үндэһэтэнэй 1-дэхи лицей-интернадай һурагшад болоно. Уласаа түлөөлһэн эдир хабаадагшад Ородой Холбоото Уласай эрхим һургуулинуудай шабинартай урилдаһан байна.

Буряад Уласай Болбосоролой болон эрдэм ухаанай яаманай сайдай нэгэдэхи орлогшо Виталий Бурдуковский үхибүүдэй эрмэлзэл, эрдэм бэлиг сэгнэжэ, түлөөлһэн эмхи зургаанайнгаа зүгһөө үхибүүдтэ, тэдэнэй түрэлхидтэ болон багшанарта баяраа мэдүүлбэ.

Буряад Уласай үхибүүд 2-дохи жэлээ энэ олимпиадада хабаадажа, эрхим амжалтануудые туйлана. 

Буряад Уласай Болбосоролой болон эрдэм ухаанай сайтһаа гэрэл зураг абтаба.