​Бүгэдэ зоной хабаадалгатай диктант

Улаан-Үдэ хотодо ажаһуудаг зондо ород хэлэн дээрэ хэр зэргэ бэ­шэдэгээ шалгаха арга боломжо олгогдобо. Ушар юуб гэхэдэ, апре­лиин найманда бүхы гүрэн дотор «Бүгэдэ зоной хабаадаха сээжэ бэшэг (диктант)» («Тотальный диктант») гэһэн ниитэ гаршагтай хэмжээ ябуулга эмхидхэгдэбэ ха юм. Ородоор бэшэмэл хэлэндэ хэр бэр­хэ байһанаа энэ удаа 750 улаан-үдынхид шалгаба. Уран зохёолшо Исай Калистратович Калашниковай нэрэмжэтэ номой санда болоһон энэ хэмжээ ябуулга тухай тодорхойгоор хөөрэлтэй.

Улаан-Үдэдэ энэ жэлдэ 9 ондоо тээ «Бүгэдэ зоной хабаадаха дик­тант» боложо үнгэрөө. Улаан-Үдэдэ долоодохи жэлээ соносхогдоhон алдуугүйгөөр бэшэгшэдэй мүрысөөн Буряад Уласай ниислэлдэ яаха аргагүй хабаатай байба. Юуб гэ­хэдэ, диктант бэшэхэ гэжэ ерэһэн зон мэдээжэ уран зохёолшо Леонид Юзефовичэй найруулһан гурбан зо­хёолой нэгэниинь Улаан-Үдэ хото­до, Сэлэнгэ мүрэндэ зорюулагдаһан байба бшуу.

Исай Калашниковай нэрэмжэ­тэ номой санда таби гаран хүн су­глараа. Хүлеэгдэһэнһээ олон зоной суглархада, тэндэхи мэргэжэлтэд диктант бэшэхэ дуратайшуулда һууринуудые гүйлдэжэ байгаад бэл­дэжэ үгэбэ.

- Багша ябаһан хадаа юумэ мартахагүй гэжэ оролдодогби, өөрынгөө мэдэсэ, ород хэлэ ямараар мэдэнэбиб гэжэ шалгаха зорилготой ерээлби даа, - гэжэ Улаан-Үдэ хотын ажаһуугша, багшын ажалай ветеран Дари Ойдопова тайлбарилба.

Уран зохёолшо Леонид Юзефович гэгшын гурбан текстнүүдэй Санкт- Петербург, Нева мүрэн тухай зохё­ол улаан-үдынхидтэ тудаһан бай­ба. Диктант дотор сэглэлтын олон тэмдэгүүд байха гээд эмхидхэгшэд сугларһан олондо дуулгаба. Үшөө нэгэ онсо ажаглама зүйл гэхэдэ, энэ жэлдэ диктант багшанар бэшэ, ха­рин мэдээжэ сэтгүүлшэд уншажа үгэбэ. Жараад шахуу минутын тур­шада үргэлжэлһэн энэ диктантын һүүлээр тэрэниие бэшэхэнь орёохон лэ байба гэжэ бэшэжэ туршагшадай олонхинь тэмдэглээ.

- Ехэдээл һаа, эндэ-тэндэ сэгүүдые (запятой) алдааб гэжэ һананаб. Ор­фографическа алдуунууд тухай хэ­лэхэ болоо һаа, магад, нэгэн-хоёр ал­дуу хэжэ болооб. Ехэ бэрхээр бэшээб гэжэ һананаб, - гэжэ Светлана Гом­боева хөөрэнэ.

«Бүгэдэ зоной хабаадаһан дик­тантын» дүнгүүдые яаралгүйгөөр согсолхын тула эмхидхэгшэд дүрбэн үдэр ажллаhан байна. Тиигэ­жэ апрелиин найманда диктант бэшэһэн аад, апрелиин арбан хоёр болотор тус хэмжээ ябуулгада ха­баадагшад байра һуурияа оложо ядан хүлеэбэ. Тиимэһээ дүнгүүдээ харахаяа һанабал, http://totaldict. ru гэһэн сайтда орожо, һанаагаа амаруулха аргатайт гэжэ дуулга­набди.

Баяр Жигмитовэй гэрэл зураг

Диктантын үедэ