759
Москва хотодо “Делай, как я!” гэһэн Бүхэроссиин сэрэгэй-патриотическа конкурсын түгэсхэлэй шата үнгэргэгдэбэ.
“Роспатриотцентр” гэһэн федеральна гүрэнэй бюджедэй эмхи зургаан (ФГБУ), сэрэгэй патриотическа “Вымпел” гэһэн түб болон “Ородой Холбоото Уласай һурагшадай хүдэлөөн” гэһэн Бүхэроссиин ниитэ- гүрэнэй үхибүүдэй болон эдиршүүлэй эмхи энэ хэмжээ ябуулга эмхидхэһэн байна. Мүрысөөнэй түгэсхэлэй шатада Ород гүрэнэй можо нютагуудай 20 түлөөлэгшэд хабаадаба. Тэдэнэй тоодо Буряад Уласай үндэһэтэнэй 1-дэхи лицей-интернат дүүргэһэн Баир Цыбанов оролсоо. Тэрэ лицейн дэргэдэ ажалаа ябуулдаг “Тамир” гэһэн сэрэгэй-патриотическа клуб түлөөлһэн байна.
Түгэсхэлэй шатада эдир хүбүүд 3 үдэрэй туршада эрдэм мэдэсэеэ, хаба шадалаа туршалсаба. Тэдэнэр эхэ оронойнгоо түүхэ мэдэхэ, бэдэрэлгын ажал ябуулжа шадаха, бүхэ голтой, ямаршье бэрхэшээлнүүдые дабаха шадалтай байһанаа харуулжа, бэлдэһэн түсэлнүүдээ хамгаалба. Тэрэнэй дүнгүүдээр “Сэрэгэй-патриотическа нэгэдэлэй эрхим хүмүүжэмэл” гэһэн номинацида Баир Цыбанов түрүүлбэ.
- Би энээндэ удаан саг соо бэлдээб. Энэ хэмжээ ябуулга эмхидхэгшэд болон хабаадагшадта баярые хүргэнэм,- гэжэ Баир Цыбанов туйлаһан амжалта тухайгаа хэлэбэ.
Кремлиин ехэ ордоной Малахитова танхим соо апрелиин 16-да түгэсхэлэй шатада хабаадагшадые амаршалгын баяр ёһолол үнгэргэгдэбэ. “Вымпел” гэһэн сэрэгэй патриотическа түбэй захирал Святослав Омельченко, Ородой Холбоото Уласай Олониитын танхимай гэшүүн, “ Ородой Холбоото Уласай бэдэрэлгын хүдэлөөн” гэһэн эмхиин харюусалгата секретарь Елена Цунаева гэгшэд баярай үгэнүүдые хэлэбэ.
“Делай, как я!” гэһэн үгэнүүд бэдэрэлгын болон патриотическа нэгэдэлнүүдэй хүтэлбэрилэгшэд, инструкторнууд болон хүмүүжэмэлнүүдэй уряал болонхой. Эхэ орондоо дуратай ,үнэн сэхэ хүнүүдые хүмүүжэлгын эгээл эрхим методическа заабаринууд, бодолнуудаар хубаалдаха гэжэ энэ мүрысөөн эмхидхэгдэһэн байха юм.
Болбосоролой болон эрдэм ухаанай сайтһаа гэрэл зураг абтаба.
