684
Буряад Уласта 10710 Эсэгэ ороноо хамгаалгын дайнай ветеранууд ажаһуудаг, 557-ниинь дайнда хабаадагшад болон дайнай инвалидууд, 8 мянга шахуу дайнай ара талын ажалда хабаадагшад, 2 мянганһаа дээшэ нүхэрөө алдаһан эхэнэрнүүд болоно.
2016 ондо Буряад Уласта ниигэмэй хамгаалгын талаар ажаһуугшадые дэмжэлгэдэ федеральна бюджедһээ 119, 5 млн. түхэриг, уласай бюджедһээ 63,6 млн. түхэриг мүнгэн гаргашалагдаа.
2008 ондо дайнай ветерануудые гэр байратай болгохо талаар абтаһан программаар 4351 хүн гэр байраяа һайжаруулһан байна. Энэ хэрэгтэ федеральна бюджедһээ 3 млрд. 800 млн. түхэриг мүнгэн һомологдоһон юм.
2016 ондо 90 ветеранууд гэр байратай болоһон байна. Дайнда хабаадагшад болон дайнда эрэмдэг бэетэй болоһон ветеранууд энэ программаар түрүүлэн ээлжээндэ ороһон байна. Тэдэнэй гэр бүлын байдал һайжаруулгада 108 млн. түхэриг мүнгэн гаргашалагдаа.
Мүнөөдэрэй тоо баримтаар гэр байраяа һайжаруулха ээлжээндэ 39 ветеранууд оронхой, тэдэнэй 3-ниинь дайнай ветеранууд юм. Ородой Холбоото Уласай Барилгын болон гэр байрын ажахы шэнэдхэлгын яаманай мэдээсэһээр, федеральна бюджедһээ 34 млн. 600 мянган түхэриг мүнгэн орохо. Тиихэдэнь, дайнда хабаадаһан, дайнда эрэмдэг бэетэй болоһон ветеранууд түрүүлэн гэр байратай болохо юм.
Гэр байратай болонхой, тиимэһээ федеральна программада ороогүй Эсэгэ ороноо хамгаалгын Агууехэ дайнай 29 ветеранууд 2017 ондо заһабарилгын ажал ябуулха 40 мянган түхэригэй мүнгэн тэдхэмжэдэ хүртэхэ юм. Комиссиин шиидхэбэреээр шэлэгдэһэн ветерануудта 1млн. 160 мянган түхэриг мүнгэн уласай бюджедһээ гаргашалагдаха юм.
