725
Эрхүү хотын Ородой Холбооной гүрэнэй хуули сахилгын дээдэ һургуулиин (Российский Государственный Университет Правосудия) 3- дахи курсын оюутан Аюна Даржаева эдэбхитэй, эрмэлзэлтэй, урагшаа һанаатай оюутан басаган юм.
Аюна һурахадаа бэрхэ, ниитын ажабайдалда эдэбхитэйгээр хабаададаг. Эндэ һурахада тиимэ бэлэн бэшэшье һаань, хэшээлнүүд һонин, тиимэhээ хамаг хүндэ шэнгеэр һанагдаһан дабаанууд дабагдашоод лэ байха юм гэжэ тэрэ хэлэнэ.
- Аюна, ямар ушарhааа иимэ мэргэжэл шэлээбши?
-Үшөө 4-дэхи класста һуража байхадам, намһаа хэн болохобши гэжэ асуухадань, бодолгото болоншьегүй, судья болохоб гэдэг байгааб. Юундэ тиигэжэ хэлэдэг байhанаа ойлгодоггүйб. 9-дэхи класста һуража эхилхэдээ, эмшэн болохо хүсэлтэй болооб. Эжымни эмшэн – анестезиологоор хүдэлдэг, би аргагүй омогорходогби. Энэ шэглэлээр хэшээлнүүдтэшье ядалсадаггүй байгааб. Химеэр аймагай олимпиадада шүүгээ hэм. Эмшэн болохош гэжэ хамаг түрэл гаралайнгаа, нүхэдэйнгөө ходо хэлэдэг болоходонь,би эсэргүүсэжэ, сурбалжалагша болохо хүсэлтэй болооб. Һургуулидаа энэ шэглэлээр нүхэдтэеэ ехэ эдэбхитэй ажал ябуулаабди. 11-дэхи класста ороходоо, саашанхи хуби заяаагаа шиидхэхэ саг ерээ. Тэрэ үедэ би гайхагша һэмби, яагаад 17-той үхибүүн ажабайдал гээшые дүүрэн мэдэхэгүй аад , өөрынгөө ерээдүйе шэлэдэг юм бэ гэжэ. Тиигэбэшье мэргэжэлээ шэлэхэдээ, аба эжытэеэ зүбшэжэ, юрист болохо гэжэ шиидээб. Абамни милицидэ хүдэлһэн, майор нэрэ зэргэтэй юм.
- Һуралсалhаа гадуур юу хэдэгбши?
- Оюутан болоhонhоо хойшо олон хэмжээ ябуулгануудта эдэбхитэйгээр хабаададагби. Һургуулиин байхадаа, сурбалжалагшын дүй дүршэлтэй болоһон тула дээдэ һургуулида энэ ажаябуулгаяа үргэлжэлүүлнэб. Оюутадай зүблөөнэй (студенческий совет) дэргэдэ олондо мэдээсэл тараадаг хэрэгсэлнүүдэй хорооной түрүүлэгшэ болооб. Хоёр жэлэй туршада энэ ажал ябуулааб. Эндэ хүдэлхэ үедөө урагшаа һанаатай, эдэбхи ехэтэй олон залуушуултай танил болооб. Сэгнэшэгүй дүй дүршэлтэй болоһондоо ехэ баяртайб. Мүнөө Эрхүү хотын залуушуулай захиргаанай байгууламжатай (молодёжная мэрия) хүдэлнэб. Фестиваль болон хотын һайндэрнүүдые эмхидхэдэгбди.
- Оюутан ябаха гээшэ эгээл сэнгүү хаһа гэжэ олонхи зон хэлэдэг . Энээн тухай юун гэжэ бодонобши?
- Оюутадай ажабайдал залхуутай гү, али һонигүй байдаггүй гэжэ һананаб. Үдэрөө яагаад үнгэргэхэ тухай түсэблэжэ, тэрэнээ баримталан ажалаа дүүргэхэдэ, намда ехэ һонирхолтой байдаг.
Үдэшэ хэһэн ажалайнгаа дүн согсолходоо, хооһоор зайжа, зуража үдэр үнгэргөөгүйб гэһэн мэдэрэл аятай зохид байдаг. Оюутадай сэнгүү хаһа тухай,
минии һанахада, 30-һаа дээшэ наһатай зон ехэнхидээ хэлэдэг. Мүнөө үеын үсөөхэн оюутад энээниие зүбшөөхэ байха гэжэ һананаб. Юундэб гэхэдэ, анхан оюутадые гүрэн түрэ ажалаар хангадаг байгаа ха юм. Харин мүнөө сүлөө сагаа сэнгэжэ үнгэргэхэ бэшэ, харин ерээдүй тухайгаа бодолгото боложо, олон янзын шалгалтануудые дабажа, туршаха саг ерээ. Тиимэһээ сагаа алман, мүнөөнһөө ажал бэдэржэ, дуратай шэглэлээ шэлэжэ, дүй дүршэлтэй болохо гэжэ оролдоноб.
- Ямар шэглэлээр мэргэжэлтэн болохоёо шиидээ гүш?
- Минии һуража байһан дээдэ һургуулида сүүдэй һалбарида хүдэлхэ мэргэжэлтэдые бэлдэдэг. сүүдэй секретарь гэhэн мэргэжэлээр практика гараһанай удаа энэ шэглэлэээр лаб хүдэлхэгүйб гэжэ ойлгооб. Мүрдэлгын хороондо гү, али прокуратурада хүдэлхэ һанаатайб. Һуралсалаа дүүргэхэдээ, энээнhээ урда тээ ажабайдалай үргэн харгыда алхам бүхэндэм дэмжэжэ, дахуулжа байһан аба эжы, багшанартаа найдаад ябаха бэшэ, харин өөрынгөө олоһон эрдэм мэдэсэ, хүсэ шадалаа, эрмэлзэлээ хэрэглэжэ, hайн ажалтай болохо шухала гэжэ һананаб. Тиихэдээл түрэһэн, үргэһэн аба эжыдээ, һургаһан багшанартаа ашыень харюулжа, нютагайнгаа нэрые дээрэ үргэжэ, хүн шарайгаа алдангүй ябахаб гэжэ найданаб.
Хүхюу, хүнгэн абари зантай, олоной хэрэгтэ солбон шударгы, хэжэ байһан ажалдаа харюусалгатай, үетэн нүхэдэй үнэн сэхэ дэмжэлгэтэй, юумэнһээ айдаггүй, эрмэлзэл ехэтэй Аюна ажабайдалай урасхалда һанаһанаа бэелүүлжэ, урагшатай ябахал байха.
Дарима Анандаева
