617
“Афганистанай ветерануудай Ородой холбоон” бүгэдэ ородой ниитын эмхи Буряад Уласта ажалаа урагшатайгаар ябуулжа байдаг. Тэдэнэр Афганистанай дайнда болон һүүлээрнь шархануудһаань ами наһаяа алдаһан нүхэдэйнгөө мүнхэ дурасхаалда зорюулан хэмжээ ябуулгануудые үнгэргэдэг заншалтай.
2017 оной майн 3-да Тулаевай гудамжаар оршодог 148-дахи гэрэй дэргэдэ Афганистанда болоһон дайнда һураггүйгөөр үгы болоһон, “За боевые заслуги” гэһэн медалиин кавалер Юрий Николаевич Оленниковтэ зорюулагдаһан бага футболоор турнир түрүүшынхиеэ үнгэргэгдэхэ юм.
2017 оной майн 4-дэ үглөөнэй 10 сагта Улаан-Үдын 20-дохи һургуулида Эсэгэ ороноо хамгаалгын Агууехэ дайнай ветеранууд болон Афганистанда болоһон дайнай хабаадагшадтай уулзалга эмхидхэгдэхэ юм. Энэ уулзалгада “Афганистан болит в моей душе...” гэһэн хэмжээ ябуулга һурагшадта зорюулагдаха. Майн 9-дэ Соведүүдэй Талмай дээрэ “Бессмертный полк Афганской войны” гэһэн акцида Афган дайнда ами наһаяа алдаһан, һураггүйгөөр үгы болоһон, дайнһаа бусаад, шархануудһаань наһа бараһан хүбүүдэй түрэлхид болон нүхэдынь хабаадаха.
2017 оной майн 13-да Хори аймагай Тээгдын дунда һургуулида 10-дахи, 11-дэхи классуудай һурагшадай дунда Агуу Илалтын 72 жэлэй ойн баярта болон 1988 оной майн 15-да Афганистан Уласһаа совет сэрэгүүдые гаргажа эхилһэн үдэртэ дашарамдуулан, сэрэгэй- тамирай мүрысөөн эмхидхэгдэхэ юм.
