742
Буряад Уласта Агуу Илалтын 72 жэлэй ойн баярта зорюулһан хэмжээ ябуулгануудта бэлэдхэл эхилэнхэй. Тэрэнэй тоодо “Хэтын жагсаал” гэһэн хэмжээ ябуулга онсо һуури эзэлнэ.
2017 оной апрелиин 24-дэ эмхидхэлэй хорооной суглааан үнгэргэгдэһэн байна. Баяр ёһололой болон уран һайханай талаар бэлэдхэлэй асуудалнуудһаа гадуур, хэмжээ ябуулгын аюулгүйгөөр үнгэргэгдэхэ тухай суглаанда хэлсэбэ.
Илангаяа олон зоной хабаадалгатайгаар үнгэргэгдэдэг “Хэтын жагсаалда” онсо анхарал хандуулагдаха юм. 2016 ондо энэ хэмжээ ябуулгада 15 мянганһаа дээшэ зон хабаадаһан байна. Мүнөөшье жэл Эсэгэ ороноо хамгаалгын Агууехэ дайнда баатарай үхэлөөр унаһан сэрэгшэдэй нэрыень мүнхэлэн, жагсаалда ябаха зон олоор хүлеэгдэнэ. Буряад Уласай Толгойлогшын уялга дүүргэгшэ Алексей Цыденов ажаһуугшадтай хамта энэ хэмжээ ябуулгада хабаадаха юм.
“Хэтын жагсаалда” хабаадаха зон үглөөнэй 10 сагта Ранжуровай гудамжада сугларха юм.
Анна Огороднигой гэрэл зураг.
