618
Ородой Холбоото Уласай Транспортын сайд Максим Соколов ажалай хэрэгээр Буряад Улас ерэнхэй. “Аюулгүй, һайн шанартай харгынууд” гэһэн түсэлөөр бэелүүлэгдэжэ байһан харгы заһабарилга тэрэ сэгнэбэ.
Буряад Уласай Улаан-Үдэ хотын болон хотын шадархи 4 аймагуудай 864 модоной зайн харгы заһабарилга энэ программада оруулагданхай. Заһабарилагдаха харгынуудые ажаһуугшадтай хамта элирүүлэгдэһэн юм. Улаан-Үдэ орохоһоо эхилээд, Горький микрорайоной Орловская гудамжа хүрэтэр эгээл муу харгы гэжэ ажаһуугшад элирүүлһэн байна. 113-дахи кварталай харгы заһабарилгын ажал түрүүлэн ябуулагдаха юм. Энэ хэрэгтэ 200 млн. түхэригһөө дээшэ мүнгэн гаргашаладаха болоно. Тиихэдээ эндэ харгы үргэн болгогдожо, ябаган харгынууд хэгдэхэ юм. Энэ зүгэй харгы заһабарилгада олон хүн дуугаа үгэһэн байна. Һүүлэй 3 жэлдэ Улаан-Үдэ хотын Октябрьска аймагай ажаһуугшад 7 мянган хүүгээр олон болоо. 100-дахи кварталнуудта 23 мянганһаа 30 мянган болотор ажаһуугшадай тоо олошороо.
- Энэ зүгэй харгы заһабарилха шиидхэбэри гайхалгүй. “Байгал” гэһэн федеральна хыргыһаа энэ харгыда орохоор ха юм. Тэндэшье шэнэ гэрнүүд баригдажа, ниигэмэй хангалгын байгууламжа хүгжэнэ. Тарбагатай аймагта 0-8 модоной зайда харгы заһаха түсэл энэ жэлдэ бэелүүлхэбди. Энэ хэрэгтэ 460-аад млн. түхэригһөө дээшэ мүнгэн гаргашалагдаха болоно, - гэжэ Буряад Уласай Транспортын, элшэ хүсэнэй болон харгын ажахы хүгжөөлгын сайд Сергей Козлов тэмдэглэбэ.
Үшөө тиихэдэ, Загарай аймагһаа Улаан-Үдэ орохо харгы болон Восточный һууринай харгы заһабарилагдаха. 2017 ондо 54 модоной зайда харгы заһабарилагдаха юм.
- Буряад Уласта энэ талаар ябуулагдаха ажал ехэ. Харгы заһабарилха түсэлдэ ажаһуугшадые эдэбхитэйгээр хабаадуулха шухала. Транспортын хангалга байгууламжа хүгжөөхэ программада байгша оной болон удаадахи жэлнүүдтэ хэгдэхэ ажал тухай тэдэнэр мэдэжэ, дурадхалнуудаа оруулжа байха болоно, - гэжэ Ородой Холбоото Уласай Транспортын сайд Максим Соколов хэлэбэ.
“Аюулгүй, һайн шанартай харгынууд” гэһэн түсэл бэелүүлгэ олондо ойлгосотой байха ёһотой. Ородой Холбоото Уласай ОНФ-эй Буряадтахи таһаг болон Буряад Уласай Олониитын танхим энэ талаар хэгдэхэ ажал хиналгада хабаадаха юм.
