666
Буряад Уласай Арадай Хуралда фермернүүдтэ түлбэригүйгөөр газар 20 га дамжуулха тухай хуули 2-дохи уншалгада абтаба.
“Газар тухай” гэһэн уласай хуулида хубилалтануудые оруулха гэһэн асуудалаар һунгамалнууд тоосолдобо. Хүдөө ажахы эрхилэгшэдтэ бага хэмжээнэй талмайнууд үгтэнэ гэжэ зарим хэды һунгамалнууд һанана. Буряад Уласай Зөөриин болон газарай харилсаанай талаар яаманай мэдээсэһээр, энэ хуули абтаагүй һаа, Буряад Улас хүдөө ажахын һалбарида жэл алдагдаха. Тимэһээ энэ хуули 2-дохи уншалгада абтаба гэжэ Буряад Үнэнэй мэдээсэлэй албан дуулгана.
Ородой Холбоото Уласай 60-аад можо, нютагуудта энэ хуули абтанхай, тиихэдээ можо бүхэндэ газарай талмайнуудай хэмжээ ондо ондоо гэжэ Буряад Уласай Арадай Хуралай Газарай асуудалнуудай, аграрна бодолгын болон эд хэрэглэлгын талаар хорооной түрүүлэгшэ Александр Попов хэлэбэ.
Ородой Холбоото Уласай Газарай кодексын 39.10 статьягай ёһоор, гүрэнэй гү, али нютаг засагай байгууламжануудай мэдэлдэ байһан газарнуудые үмсын ажахынуудта зургаан жэлһээ ехэ бэшэ болзорто түлбэригүйгөөр дамжуулагдадаг юм. Ородой Холбоото Уласай Газарай кодексын 4-дэхи пунктын 39.5 статьягай ёһоор, үгтэһэн газар элдүүрилжэ, зүбөөр хэрэглэһэн байгаа һаа, 5 жэлэй үнгэрхэдэ тэрэниие өөрын мэдэлэй болгохоор .
Буряад Уласта олон нютагай засагай байгууламжануудта мал үүсхэбэрилгэ хүгжэнхэй. Тиигэбэшье мал тэжээхэ, үсхэхэ газарнуудые дансатай болгохо талаар асуудалнууд шиидхэгдээгүй. Абтаһан хубилалтануудай ашаар, хүдөө ажахынууд 3 га талмайн газарһаа 20 га хүрэтэр газар абаха эрхэтэй болохо.
Арадай Хурал энэ асуудалаар аймагуудай дурадхал хараадаа абанагүй гэжэ һунгамал Виктор Аюшеев тэмдэглэбэ. Энэ асуудалаар һунгамалнуудһаа нэгэшье дурадхал ороогүй гэжэ Буряад Уласай Арадай Хуралай Газарай асуудалнуудай, аграрна бодолгын болон эд хэрэглэлгын талаар хороооной түрүүлэгшэ Александр Попов хэлэбэ.
- Энэ асуудалаар дурадхалнуудай ороо һаа, бидэ тэрэниие хараадаа абахаар бэлэн байгаабди. Кемерово можотой сасуулһанай хэрэггүй. Тэдэнэр хүдөө ажахын үйлэдбэри манай эндэхиһээ 3 дахин ехэ,- гэжэ тэрэ тэмдэглэбэ.
Тэрэниие Сергей Мезенин дэмжэһэн байна.
- Аймаг бүхэн энэ талаар өөһэдөө ажал ябуулха. Газар хэрэглэгдээгүй һаань, тэрэниие һөөргэнь бусааха болохо, - гэжэ тэрэ хэлэбэ.
Энэ хуулиин абтаагүй һаа, фермернүүд мүнөө жэл ажалаа эрхилжэ шадахагүй гэжэ Буряад Уласай Зөөриин болон газарай харилсаанай талаар сайд Маргарита Магомедова һануулба.
Үгтэһэн газарай дүрбэдэхи хубиһаа бага газар хэрэглэгдэнэ. Хүдөө ажахы эрхилэгшэдтэ 6 жэлээр газар үгэнэбди. Һомоной дарганар энэ талаар хинаха юм. Зүбөөр газар хэрэглэгдээ һаань, тэрэ газараа өөрынгөө болгохо эрхэтэй болохо гэжэ сайд хэлэбэ.
