749
Буряадай гүрэнэй ехэ һургуулида Буряад Уласай “Эрхим багша-2017” гэһэн уласай 21-дэхи мүрысөөнэй дүнгүүд согсологдобо.
Буряад Уласай Толгойлогшын уялга дүүргэгшэ Алексей Цыденов, Болбосоролой болон эрдэм ухаанай сайдай уялга саг зуура дүүргэгшэ Баир Жалсанов, Засагай газарай ниигэмэй хүгжэлтын талаар орлогшо Владимир Матханов, Арадай Хуралай ниигэмэй бодолгын талаар хорооной түрүүлэгшэ Александр Стопичев, Буряадай гүрэнэй ехэ һургуулиин захирал Николай Мошкин, аймагуудай гулваанар, болбосоролой эмхинүүдэй хүтэлбэрилэгшэд болон һургуулинуудай захиралнууд баяр ёһололдо хабаадаба.
- Хүндэтэ манай багшанар! Танай сэгнэшэгүй ажалһаа уласаймнай хүгжэлтэ дулдыдана. Үхибүүдые һургажа, гэгээрүүлжэ ябанат,- гэжэ Буряад Уласай Толгойлогшын уялга дүүргэгшэ Алексей Цыденов баяр ёһололой хэмжээ ябуулгада хэлэбэ.
Долоон хоногой туршада уласай 28 багшанар шалгалтануудые гаража, багшын ажалай дүй дүршэлөөр хубаалдажа, болбосоролой бодолгын талаар эрдэм мэдэсэеэ шалгаба. Мүрысөөнэй 3 шатын дүнгүүдээр Буряад Уласай “Эрхим багша -2017” гэһэн нэрэ зэргэдэ болон Гран-При шанда Улаан-Үдын 25-дахи һургуулиин багша Елена Анатольевна Бурдукова хүртэбэ. Тэрээндэ Болбосоролой болон эрдэм ухаанай яаманай “Мүнгэн бадма сэсэг” гэһэн тусхай шан барюулагдаба. Үшөө тиихэдэ, телевизор болон 25 мянган түхэригэй үнэмшэлгэ эрхим багшада бэлэглэбэ.
- Би аргагүй баяртайб. 25-дахи һургуулиингаа нэрыень дээрэ үргэжэ, суг хүдэлжэ байһан нүхэдтэеэ хамта ажалдаа зохёохы хандасатай, эбтэй хүдэлдэгбди. Саашадаа үшөө үндэр дабаа дабаха болоноб,- гэжэ Елена Бурдукова хэлэбэ.
Буряад Уласай Болбосоролой болон эрдэм ухаанай яаманай дэмжэлгээр “Эрхим багша” гэһэн мүрысөөн эмхидхэгдэнэ. Болбосоролой болон эрдэм ухаанай сайдай уялга саг зуура дүүргэгшэ Баир Жалсановай хэлэһээр энэ мүрысөөн 25-дахияа үнгэргэгдэбэ. 1992 ондо түрүүшынхиеэ эмхидхэгдэһэн конкурсдо 47- дохи һургуулиин багша Баяр Самаданович Гомбоев илаһан байна. 1993, 1994 онуудта эдэй засагай байдалһаа боложо “Эрхим багша” гэһэн мүрысөөн үнгэргэгдөөгүй. 2000 онһоо хойшо энэ мүрысөөн жэл бүри эмхидхэгдэнэ.
- Мүрысөөндэ бүхы багшанар эрхимээр хабаадаа. Бэлэдхэл ехэтэй Елена Бурдукова илажа шадаа. Мүнөө үедэ хүдэлжэ байһан багшанар сагай эрилтэнүүдтэ тааруугаар ажалаа ябуулна. Иимэ мэргэжэнги багшанарай һургуулинуудта хүдэлдэг һаань, ургажа ябаа үхибүүдэй ерээдүй бата бэхи байха, - гэжэ Баир Жалсанов тэмдэглэбэ.
“Эрхим багша - 2017” гэһэн Бүхэроссиин мүрысөөнэй түгэсхэлэй шатада Елена Бурдукова уласаа түлөөлхэ. Заншалта ёһоор, мүрысөөнэй түгэсхэлэй шата Москва хото болон Краснодарска хизаарта үнгэргэгдэхэ юм.
Болбосоролой болон эрдэм ухаанай сайтһаа гэрэл зураг абтаба.
