767
2017 оной апрелиин 1-нэй тоо баримтаар, Буряад Уласта 10710 Эсэгэ ороноо хамгаалгын дайнай ветеранууд ажаһуудаг, 557-ниинь дайнда хабаадагшад болон дайнай инвалидууд, 8 мянга шахуу дайнай ара талын ажалда хабаадагшад, 2 мянганһаа дээшэ нүхэрөө алдаһан эхэнэрнүүд болоно.
2016 ондо федеральна болон уласай бюджедһээ тэдэнэртэ 183 млн.түхэриг мүнгэн ниигэмэй туһа хүргэлгэдэ гаргашалагдаһан байна. Буряад Уласай ветерануудта ниигэмэй туһа хүргэхэ гэжэ федеральна бюджедһээ 119 млн. 500 мянган түхэриг һомологдоо. Коммунальна туһа хангамжа, гэр байрын байдал һайжаруулгада, эмнэлгын туһа хүргэлгэ гэхэ мэтэдэ энэ мүнгэн гаргашалагдаба. Уласай бюджедһээ энэ хэрэгтэ 63 млн. 661 мянган түхэриг һомологдоо. Үшөө тиихэдэ, ажалай ветеранууд, ара талын хүдэлмэрилэгшэд, гэм хээгүй аад, хардагдажа, удаань сагааруулагдаһан хүнүүд болон дайнай үеын үхибүүдтэ һара бүри түлэгдэдэг мүнгэндэ 6 процентээр нэмэхэ тухай мэдүүлгэ Буряад Уласай Арадай Хуралай апрелиин сессидэ оруулагдаһан байна.
2015 оной январиин 1-һээ Буряад Уласта “дайнай үхибүүдтэ” ниигэмэй туһа хүргэхэ тухай хуули бэелүүлэгдэжэ эхилэнхэй. 1928 оной январиин 1-һээ 1945 оной сентябриин 2 болотор болзорто түрэгдэһэн үхибүүд энэ туһада хүртэдэг юм. Хуулиин бэелүүлэгдэжэ эхилһэнһээ хойшо 33,5 мянган хүнүүд үнэмшэлгэнүүдые абаһан байна.
Буряад Уласай Толгойлогшын уялга дүүргэгшэ Алексей Цыденов майн 9-нэй һайндэрөөр ветерануудые амаршалха юм.
