​Монгол хүүгэдтэй мүрысөөд ерээ

Буряад Уласай Yндэһэтэнэй 1-дэхи лицей-hургуулиин болон 29-дэхи Буряад гимназиин дүрбэн һурагшад Монголой Хэнтэйн аймагай Чингис хотодо физикээр үнгэрһэн 30-дахи олимпиадада хабаадалсаба. 

Хэд бэ гэбэл, 29-дэхи гимназиин 8-дахи ангиин һурагша Хамгушкеева Ирина ба 10-дахи ангиин һурагша Будаев Буда, 1-дэхи лицей-hургуулиин мүн лэ 8-дахи ангиин һурагша Басалханов Дима ба 10-дахи ангиин һурагша Дашацыренов Сультим гэгшэд эрдэм мэдэсээрээ Монголой һурагшадтай туршалсаа. Тэдэнтэй хамта һургуулинуудай захиралнууд Булат Шойнжонов, Баир Ширапов болон физикын багшанар Андрей Чагдуров, Одон Жалсараев гэгшэд ошолсоһон байна.

– Манай гимнази Улаан-Баатарай нэгэ дүгээр дунда һургуулитай хэлсээ баталанхай. Тэрэ һургуулиин һурагшад манда ерэжэ, элдэб мүрысөөнүүдтэ хабаададаг, харюудань манай шабинар ошодог. Хоёр долоон хоногой туршада багшанар ошожо, дүй дүршэлөөрөө хубаалдадаг юм. 

Нёдондо тэрэ һургуулиин багшанартай сугтаа бидэ Бурхан Халдун ошожо ерээ һэмди. Тэндэ ябахадамнай, мүнөө жэлэй апрель һарада физикээр 30-дахи олимпиада үнгэргэхэбди гэжэ бидэнэрые уриһан байгаа. Монгол Уласай hургуулинууд, аймагуудһаа шэлэгдэhэн 9-12-дохи ангинуудай 140 үхибүүд хабаадаһан байна. Энэ олимпиадын һонин юумэниинь гэхэдэ, үхибүүдһээ гадуур багшанарынь өөһэд хоорондоо мүрысэдэг юм. Тиимэһээ манай багшанар баһал хабаадалсаа. Тус олимпиада «Дэлхэйе дахуулжа гараба» гэһэн уряа доро үнгэрөө. Физикэ болбол эрдэмэй hалбаринуудай дунда эрхимынь гээшэ гэһэн удхатай. 

Олимпиадын һүүлээр монгол физик-эрдэмтэд үхибүүдэй алдуу дээрэ тогтоно, физикын эрдэмэй талаар лекци уншаа. Мүнөө үедэ физикэ хайшан гэжэ хүгжэнэб, ямар шэглэлээр ябанаб гэхэ мэтэ һонин сэдэбүүдтэй танилсуулна. Юрэнхыдөө, хаража байхада, монгол эрдэмтэд физикэдэ ехэ анхарал хандуулдаг байна. Улаан-Баатарта Монгол Уласай физикээр олимпиадын хороон бии юм байна. Тэрэниие Монголой дээдэ һургуулиин доцент, профессор Мүнхын Ганбат гэжэ хүн эрхилнэ. Энэ хүн һүүлэй арбаад жэлдэ Монголойнгоо суглуулагдамал команда ударидажа, бүхэдэлхэйн мүрысөөнүүдтэ хабаадажа, арбан эрхим командануудай тоодо ороhон юм. Манай уласай үхибүүдтэй уулзажа, хөөрэжэ үгэхыень бидэ Ганбат багшые уриһан байнабди. 

Минии һанахада, олимпиадада хабаадаhан манай үхибүүд яһала һайн дүнгүүдые харуулаа. Монголой 140 хабаадагшадай дунда Басалханов Дима 11-дэхи һуури эзэлһэн байна. Ехэ һайн гэжэ һананаб. Иимэ ехэ мүрысөөндэ үхибүүднай түрүүшынхиеэ хабаадаа гээшэ ааб даа. Тиихэдэ хэлэнэй талаар ядалсаа. Оршуулагша хэрэгтэй байгаа, – гэжэ Баир Кимович hанамжаараа хубаалдана. 

Буряад Уласай Yндэһэтэнэй 1-дэхи лицей-hургуулиин захирал Булат Шойнжонов