​Түймэрһөө хохидогшодто туһалая

Байгал шадарай аймагай Черёмушки тосхондо болоһон түймэртэ хохидоһон зондо туһаламжа суглуулагдажа эхилбэ. 

Байгал шадарай аймагай хүн зониие ниигэмэй талаар хамгаалгын таһагта хубсаһа хунар, эгээл хэрэгтэй эд бараа суглуулха талаар ажал амаралтын үдэрнүүдтэ эмхидхэгдээ. Улаан-Үдэ хотодо Хүн зониие ниигэмэй талаар хамгаалгын яаманда иимэ ажал мүн лэ ябуулагдана. Гагаринай гудамжын 10-дахи байшанда уласай энэ яаман байрладаг. Тиишэнь юумэ тушаажа болоно. Мүн тиихэдэ хүн зониие ниигэмэй талаар хамгаалгын ниислэл хотын хүтэлбэрииин байшанда, Карл Марксын нэрэмжэтэ бульвар гудамжын 14-дэхи гэртэ абаашажа үгэхэдэ болохо. Энээн тухай Буряад Уласай Толгойлогшын болон Засагай газарай хэблэлэй албан апрелиин 29-дэ дуулгаһан байна. 

Черёмушки тосхондо соробхилһон аймшагтай ехэ түймэрэй үедэ тэндэ оршодог 33 гэрэй 21-иинь дууһан шатаа гээд һануулая. Арбан долоон гэртэнь хүнүүд ажаһуудаг байгаа. Хохидоһон 10 гаран хүн эмнэлгын газарнуудта хандаа, нэгэниинь уласай ниислэл руу асаруулагдаһан юм. Ородой Холбоото Уласай Засагай газарай Түрүүлэгшэ Дмитрий Медведев Буряад Уласта, мүн баһа Сибириин федеральна тойрогой бусад нютаг можонуудта үнгэрэгшэ долоондо болоһон түймэрнүүдэй үедэ хохидоһон хамаг зондо хэрэгтэй бүхы туһаламжа үзүүлхэ тухай даабари засагай зургаануудта буулгаа.