779
2017 ондо хүдөө ажахы эрхилэгшэдые дэмжэлгэдэ 126 млн. түхэригһөө дээшэ мүнгэн һомологдоһон байна.
Энэ грантда хүртэхэеэ һанаһан фермернүүд дансануудаа Буряад Уласай Хүдөө ажахын болон эдеэ хоолой яаманда оруулба. Хүдөө ажахы эрхилжэ эхилһэн хүнүүдые дэмжэлгэдэ 99,5 млн. түхэриг мүнгэн һомологдоһон байна. Гэр бүлөөрөө үмсын хэрэг эрхилхэ хүнүүдые дэмжэхэ хэрэгтэ 7 млн. түхэриг мүнгэн гаргашалагдаха.
Бүхыдөө Буряад Уласай Хүдөө ажахын болон эдеэ хоолой яаманда 172 мэдүүлгэ хүдөө ажахы эрхилжэ эхилһэн фермернүүдһээ, 5 мэдүүлгэ гэр бүлын мал ажахы байгуулһан хүнүүдһээ ороһон байна. Майн 25 болотор грантда хүртэхэ ажахы элирүүлэгдэжэ, июнь һарада мүнгэн тэдхэмжэ үгтэхэ юм. Мүнөө жэлдэ бодото мал үүсхэбэрилгэдэ 3 млн. түхэриг мүнгэн һомологдохо. Тиихэдээ фермер бүхэн хүнүүдые ажалаар хангаха болоно. Мал ажахын үүсхэбэрилгэ жэл бүри олзотой байха ёһотой.
2012 онһоо хойшо 225 хүдөө ажахы эрхилэгшэд болон 24 гэр бүлын һүнэй фермэ байгуулһан хүнүүд мүнгэн тэдхэмжэдэ хүртэһэн байна.
