​Орденто гэр бүлэ

Алтан дэлхэй дээрэ аба эжын нэрэ нэрлʏʏлжэ ябахаһаа ʏндэр уялга ʏгы ха юм даа. Зоригтын Аюшатан ʏндэр наһатай боложо ябахадаа, Цырма, Дашанима, Гэлэг ʏхибʏʏдээрээ омогорходог һэн. Теэд хʏнэй наһан мʏнхэ бэшэ, һайхан ʏреэлээ гэрээд ʏгэ соогоо хэлээд, һубарилдаад наһанһаа нʏгшɵɵ һэн. Багаһаа ажал хэжэ, олон зон соо ябаһан Дашанима 24 наһа хʏрэжэ, наһанайнгаа нʏхэр Шогжелма гэжэ нэрэтэй Хориин Булам нютагай басагантай ниилэжэ, гэр бүлэ болоод, малшанаар хʏдэлжэ эхилһэн юм.

Шогжелмаагай бага наһанһаа хойшо Абида эсэгэеэ дахажа (тʏрэлхидынь бʏхы наһаараа хониндо хʏдэлһэн), хонин ажалда ябаһан хадань совхозой хʏтэлбэрилэгшэдэй эхэ хониной отара даажа абагты гэжэ тэдэнэй бүлэдэ дурадхахадань, хонишод болоо һэн. Тиигэжэ тэдэ олохон табан жэлнʏʏдэй туршада хонишодоор ажаллаа. Ажалай амжалта гансата туйлагдаагʏй. Ажахынгаа солото хонишодой мэргэжэл шадабари шудалжа, хʏлһэ гаргангʏй ажал хэдэггʏй, хʏдэһэ хайшалангʏй дэгэл оёдоггʏй гэһэн буряад сэсэн үгын ёһоор залуу хонишод оролдожо ажаллаа. Хʏнһөө жэшээ абажа, хʏдэлмэридэ бэрхэ хонишодой дʏршэл хэрэглэжэ, ажалдаа һайн ябаа. Тэрэ ʏедэ совхозой захирал ябаһан Дмитрий Рабданович Банзаргашеев хонишодоо ехэл магтадаг һэн. Илангаяа гэр бʏлɵɵрɵɵ хʏдэлдэг хонишодой ажалай ʏрэ дʏнгʏʏд жэлһээ жэлдэ дээшээ болодог һэн. “Аюшеев Дашанима Зориктуевич, Тарбаева Цырендыжит Мерхиновна, Цыденов Владимир Дамбаевич болон бусад 26 отара харууһалдаг хонишод ʏндэр уялгануудые абаад, тэдэнээ үлүүлэн дʏʏргэдэг байһан юм,” – гээд омогорхон хɵɵрэжэ һуухыень дуулаһан байнаб. 

1972 ондо Шогжелма Абидуевнагай амжалтатай ажалыень гʏрэн тʏрэ “Ажалай Улаан Одоной” орденоор тэмдэглэһэн байна. Уданшьегʏй гэрэй эзэн, ахалагша хонишон Дашанима Зориктуевичай ʏбсʏʏндэ Арадуудай Хани барисаанай гэһэн орден ялараа һэн. Тʏʏхэтэ юһэдэхи табан жэл ябажа байгаа. Хʏн бʏхэн, илангаяа хүдөөгэй ажалшад социалис мʏрысɵɵндэ шударгыгаар хабаадажа, тʏсэбөө жэл урид дʏʏргэхын тʏлɵɵ оролдолго гаргажа хʏдэлһэн байна. Мʏн баһа табан жэлэй дүнгөөр «Ударник 9-й пятилетки» гэһэн хʏндэтэ тэмдэгээр шагнагдаһан байна. Олон жэлдэ эдэ хонишод «Победитель социалистического соревнования» гэһэн тэмдэгʏʏдтэ хʏртэһэн юм. Эдэ тэмдэгʏʏд тэрэ ʏедэ КПСС-эй ЦК-гай, СССР-эй Министрнʏʏдэй Соведэй, ВЛКСМ-эй ЦК-гай шиидхэбэреэр олгогдодог байһан юм. Бэрхэ хонишодой гэр бʏлэ тухай багахан киносюжет буулгагдаа бэлэй. Түрүү хонишод ВДНХ- гай путёвкоор шагнагдаһан байна. Дашанима Зориктуевич, Шогжелма Абидуевна Аюшеевтэн «Буряадай АССР-эй габьяата малшан» гэһэн ʏндэр нэрэ зэргэдэ хʏртэһэн юм. Энэ ехэ ажалайнгаа хажуугаар гурбан ʏхибʏʏдые хʏл дээрэнь гаргаа юм. Мʏнɵɵ мэндэ ябаа һаа, эдэ хоёр 10 ашанарые, 9 гушанарые хаража ябаха байгаа.