724
Буряад Уласай Толгойлогшын уялга дүүргэгшэ Алексей Цыденов үбгэ эсэгэнэрэйнгээ гэрэл зурагуудые барижа, тэдэнэйнгээ дурасхаал мүнхэлбэ.
Буряад Уласай Дотоодын хэрэгүүдэй яаманай мэдээсэһээр, 20 мянганһаа дээшэ хүн зон “Хэтын жагсаал” гэһэн хэмжээ ябуулгада хабаадаһан байна. Эндэ хүгшэн, залуу илгаагүй, дайнда ами наһаяа алдаһан үбгэ эсэгэнэрэйнгээ, эжынэрэйнгээ гэрэл зурагуудые бариһан хүнүүд нэгэ доро жагсаалда зогсон алхалбад. Тэдэнэй тоодо, Буряад Уласай Толгойлогшын уялга дүүргэгшэ Алексей Цыденов энэ хэмжээ ябуулгада баһал хабаадаалсаба.
- Манай гүрэн дотор гэр бүлэ бүхэндэ дайнда хабаадаһан эрэлхэг баатарнууд бии. Минии үбгэ эсэгэ Трофим Дорофеевич Шутюк, үбгэ эсэгым аха Бутит Чимитдоржиев болон наһанайм нүхэрэй баабай Александр Константинович Мальцев гэгшэд баһал илалта шэрээлсэһэн зон юм.
Александр Константинович полкын штабай дарга байһан юм. Тэрэ хадаа Москва хото шадар Сибириин Томскын дивизиин бүридэлдэ дайнда хабаадажа эхилһэн. Удаань тэрэ баруун зүгтэ дайнда ябажа, Берлин хото эзэлһэн медаляар шагнагдаһан байна. Тэрэнэй һүүлдэ, Александр Константинович Халхин-Голой байлдаанда хабаадажа, 2-дохи шатын Улаан Одоной орденоор шагнагдаа.
Бутит Чимитдоржиев дайшалхы габьяагаа Сталинград шадар эхилжэ, дайнай дүүрэтэр дайсадтай тулалдаһан юм. Эсэгэ ороноо хамгаалгын Агууехэ дайнай дүүрэһэнэй удаа, Одессэ хотодо Г.К. Жуковай ударидалга доро алба гараһан юм. Тэндэ гэр бүлэ боложо, Ага нютаг зөөжэ ошоһон намтартай.
Трофим Шутюк партизануудай нюуса байрануудые баридаг байгаа. Загаһа бариха гэжэ түхеэржэ гараад, үнэн дээрээ ойдо далда орохо бэхижүүлгэнүүдые баридаг һэн.
Бүхэ гүрэн дотор арад зон “Хэтын жагсаал” гэһэн хэмжээ ябуулгада хабаададаг. Залуушуул, ургажа ябаа улаан бургааһад энэ хэмжээ ябуулгын сэгнэшэгүй үүргэ ойлгохо болоно. Тэдэнэр үбгэ эсэгэнэрэйнгээ аша габьагаар сүлөөтэ гүрэндэ өөдынгөө ажабайдал зохёон ажаһууха аргатай байһанаа мэдэржэ, хадуужа, һанажа ябахань шухала. Үнэхөөрөө, “Хэтын жагсаал” арад зоной зүрхэ сэдьхэлээрээ мэдэрһэн хэмжээ ябуулга болоно, - гэжэ Алексей Цыденов хэлэбэ.
Анна Огороднигой гэрэл зураг.
