750
Буряад Уласай Толгойлогшын уялга дүүргэгшэ Алексей Цыденов, Соёлой сайдай уялга дүүргэгшэ Тимур Цыбиков гэгшэд “Танцуют все” гэһэн хатарай бүлгэмүүдэй дунда үнгэргэгдэһэн хэмжээ ябуулгада илаһан “Байгал” театрай хатаршадые амаршалба.
Амжалта туйлаһан хатаршадтай эмхидхэгдэһэн уулзалгын үедэ Буряад Уласай Толгойлогшын уялга дүүргэгшэ Алексей Цыденов “Байгал” театрай хүтэлбэрилэгшэдтэ баярые хүргэбэ. Театрай захирал Дандар Бадлуев болон уран һайханай хүтэлбэрилэгшэ Жаргал Жалсанов гэгшэдтэ Буряад Уласаа эрхимээр түлөөлжэ, олондо мэдүүлжэ, бэлиг шадабарияа гэршэлбэт гэжэ Алексей Цыденов хэлэбэ.
- “Байгал” театр – үнэхөөрөө, “Буряад Уласай омогорхол”, Дандар Бадлуев, Жаргал Жалсанов хоёр хүтэлбэриглэшэдтэй хатаршад ёһотой баатарнууд,- гэжэ Алексей Самбуевич тэмдэглэбэ.
“Байгал” театрай коллектив тэдэниие дэмжэһэнэй түлөө бултанда баярые хүргэжэ, саашадаа буряад соёлоо улам хүгжөөжэ, олондо мэдүүлхэ, харуулха талаар ажалаа үргэлжэлүүлхэ тухайгаа мэдүүлбэ.
Майн 7-до Соведүүдэй талмай дээрэ “Танцуют все” гэһэн мүрысөөнэй түгэсхэлэй шатада “Байгал” театрые дэмжэжэ, 5 мянган шахуу хүн сугларһан байна.
"Танцуют все" түсэлэй сайтһаа гэрэл зураг абтаба
